– Ber preg av kynisme

Det kjem fram i ein dom frå Hordaland tingrett. Mannen var tiltala for å ha påverka ein offentleg tenesteperson til å føreta eller ikkje føreta ei tenestehandling.

Hendinga fann stad seinsommaren 2023. I eit møte fortalde mannen sakshandsamaren at han drøymde om at vedkomande låg død i ein blodpøl, omgjeven av hysteriske familiemedlemer. Dette vart tolka som ein trugsel, særleg fordi han la til at sakshandsamaren burde håpa at han ikkje var sanndrøymd.

– Meinte ikkje å skremma

Mannen erkjende ikkje straffskuld då han møtte i retten i midten av mars. Aktor la ned påstand om fengsel i 24 dagar, medan forsvararen argumenterte for frikjenning eller mildare straff. To vitne forklara seg.

Draumen hadde mannen nokre dagar før møtet fann stad, forklara han. I møtetmed Nav kom det fram at vedkomande fekk avslag på økonomisk stønad til bilreparasjon. Då vert ein fort provosert, skal han ha sagt til politiet.

I retten forklara han at han ikkje meinte å skremma sakshandsamaren. Då sakshandsamaren i møtet spurde om det var han som hadde «drepe» hen i draumen, svara mannen «nei».

Sakshandsamaren forklara at hen opplevde forteljinga om draumen som ein trugsel, og at det vart sagt til mannen. Han svara då at hen fekk ta det som hen ville, står det i domen.

– Har beklaga seg

Retten meiner at mannen har prøvd å dekkje over ein trugsel ved å fortelja om draumen. Retten finn det dessutan prova at mannen prøvde å få sakshandsamaren til å betala ut pengar. Utsegnene er makabre, utspekulerte og prega av kynisme, står det i domen. At nære familiemedlemer vart trekte inn i utsegnene, understrekar trugselen, meiner retten.

Sakshandsamaren bad om besøksforbod etter hendinga, men har seinare trekt ynsket.

I domen legg retten noka vekt på at mannen har tilstått at han sa det som er skrive i tiltaleavgjerda, og at han har beklaga seg til den fornærma. Det er tydeleg at han angrar på det som er gjort, står det i domen. Mannen vart ikkje dømd til å betala sakskostnader.