Ber om utfylling og tildekking med jord
Jan Aril Sivertsen ynskjer å ta imot massar frå utbyggingsprosjekt i Kvam.
Det skriv han i eit straumbrev til Vestland fylkeskommune.
Sivertsen eig ein liten gard på nedsida av fylkesveg 49 Vikøyvegen, i Lii mellom Skiftesgjel og Vikøy. Her ynskjer han å fylla steinmassar i fjøra og leggja på meir jord.
Han har òg kontakta Kvam herad i høve ei mogleg løysing for å fylla på massar i området Gloppe.
Då den nye Vikøyvegen vart bygd av fylkeskommunen, fekk entreprenøren lov til å tippa steinmassar i fjorden. Opprydding av sjølina er ikkje utført, påpeikar Sivertsen. Her er det ei steinrøys. Sivertsen ynskjer å få fylt ut området og dekt det med jord.
Han skriv at Vikøyvegen er ein del av dei nasjonale turistvegane, og at det hadde vore fint om arealet nedanfor bilvegen vart sett tilbake i naturleg stand. Arealet ville då verta utnytta til beite og gje tilkomst for fiske langs sjølina, skriv Sivertsen.
Han er open for å ta imot massar dersom fylkeskommunen legg ut for regulering, deponering og tildekking med jord.
