Ber om tilskot til hytte

Det går fram av ein søknad frå styreleiar Andreas Jacobsen 7. juni. Totalkostnaden med prosjektet er estimert til 7,6 millionar kroner, inkludert ein venta prisauke.

Budsjettet viser at den største kostnaden er tømrararbeid, til 2,8 millionar kroner. Grunnmurane vil kosta 402.000 kroner pluss ein eigeninnsats på 100.000 kroner. Solcellepanel vil kosta 219.000 kroner pluss 80.000 kroner i eigeninnsats. Helikoptertransport vil kosta 250.000 kroner. Elektroarbeid vil kosta 50.000 kroner, pluss ein eigeninnsats på 100.000 kroner.

Øystese Røde Kors har fått tilskot på 1 million kroner frå både Sparebankstiftelsen SR-bank og Sparebankstiftinga Hardanger. Sparebanken Vest har løyvt 600.000 kroner. Eigenkapitalen i prosjektet er på 1 million kroner, og verdien av dugnaden er estimert til 405.000 kroner. Hordaland Røde Kors løyver 410.000 kroner.

Prosjektet skal setjast i gang så snart finansieringa er på plass. Prisar er henta inn, og gode løysingar for solcellepanel, lyft av materialar og riving av den gamle hytta er funne. Dette arbeidet har teke tid, men laget er no klart for å setja i verk prosjektet, skriv Jacobsen.

Teikningane av den nye hytta viser 14 rom i tre etasjar. Dei ytre måla av hovudetasjen er 17,6 gonger 8,5 meter, inkludert ein overbygd terrasse. Bebygd areal er 150 rutemeter, og totalt bruksareal om lag 235 rutemeter.

Øystese Røde Kors sende søknaden 7. juni og purra 21. juni. I eit brev datert seks dagar seinare skriv Jon Nedkvitne, sjef for samfunn, næring og kultur i Kvam herad, at søknaden på grunn av stor saksmengd vart utsett til etter sommarferien. Saka kan tidlegast koma opp til politisk handsaming i heradsstyret 3. oktober, opplyser han.

Kva pengepott som eventuelt skal opnast, er det for tidleg å svara på, seier Nedkvitne.