– Ber om strakstiltak

Torgeir Næss (Ap) og Roald Aga Haug (Ap) skriv om farlege situasjonar langs vegen og ytrar uro for komande helg i eit brev til Vestland fylkeskommune 7. september.

– Dei siste dagane har det stått køar hundre meter opp i fylkesvegen i Tørvikbygd. Det eine køyrefeltet vert stengt, og det oppstår farlege situasjonar når bilar køyrer på gangfeltet eller på venstre side av vegen utover mot Strandebarm. Dette er farleg for både mjuke og harde trafikantar, og potensielt hindrande for utrykkingskøyretøy, skriv ordførarane.

Denne helga vert festivalen «Dyrsku'n» arrangert i Seljord, og trafikkmengda er venta å auka. Ifylgje skrivet har festivalen alltid ført til stor trafikk gjennom Kvam og Jondal mot E134.

Ferje eller varsel

I brevet vert fylkeskommunen primært beden om å setja inn ei ekstraferje, og sekundært at det går ut ei melding via Vegtrafikksentralen. Vegfarande bør ifylgje ordførarane verta bedne om å velja andre ruter.

– Uansett bør dirigentar setjast inn som avbøtande tiltak, skriv ordførarane.

I samband med den generelle trafikkauken på ferjesambandet bør ordninga med ekstraferje også inn i budsjettet for 2024, og utvidast med ein månad i kvar ende, meiner Haug og Næss. Dessutan er det naudsynt å setja av pengar til trafikksikringstiltak i krysset ovanfor ferjekaien i Tørvikbygd, skriv dei. Helst ein lang undergang.

– I dag må skuleborn og andre kryssa den sterkt trafikkerte vegen utan at det er noka form for sikring eller gangfelt. Dette er eit svært farleg punkt i dag, og med aukande trafikk vert det endå farlegare.

Inga ferje å få

Næss skriv på Facebook-sida «Tørvikbygd» at også ein video er send både til politikarar og administrasjon i fylkeskommunen. Ekstraferje vert ifylgje han ikkje sett inn. Det finst ikkje pengar til føremålet, skriv han. Heller ikkje politiet har høve til å hjelpa til med dirigering.

– Siste moglegheit for å få nokolunde levelege trafikale forhold er då å varsla Vegtrafikksentralen og be han tilrå folk å vurdera alternative reiseruter. Me er på saka, skriv Næss.

Skyss skriv på si Facebook-side at det er venta stor pågang frå Jondal til Tørvikbygd mellom klokka 12 og 18 sundag, og viser til alternative køyreruter.