Ber om stønad til sauna i hotellhagen
Ein ny sauna ved fjorden i Øystese kan få kommunal stønad.
Bak «hardingsaunaen» står West Coast Adventures AS, som har søkt kraftfondet om ein stønad på 50.000 kroner til eit prosjekt som skal kosta 205.000.
Rådmannen føreslår å gje søkjaren full utteljing i form av eit etableringstilskot. Pengane skal gå til planlegging og bygging av ein fjernstyrt sauna heilt ved utløpet av Øysteseelva, ein stad med «den finaste utsikta i verda». Søkjaren har gjort avtale med LAB Entreprenør AS og Hardangerfjord Hotel AS om tiltaket på nordsida av elva.
Ideen er at saunaen kan tingast av kven som helst på fastsette tider. Han skal vera open alle dagar. Målet er å utvikla verksemda og å skapa ein helsefremjande møteplass med plass til seks til åtte personar. Målgruppa er fyrst og fremst fastbuande i Øystese og områda kring.
Søkjaren driv med mellom anna gaida turar til fots og i kajakk. Vona er å utvida tilboda i 2025, med saunaen som eit supplement som kan vera i drift i januar eller februar. Målet er å gå i null etter eitt års drift.
Den korte vurderinga til rådmannen er at andre badstover har vore ein suksess, og at tilbodet kan styrkja Kvam som reiselivskommune og vera eit tilbod for både fastbuande og turistar.
