Ber om rask helsehjelp

Dei kom både seint og dels lettkledde etter ein fotballkamp på Voss, og dei hadde det travelt med å koma seg vidare. Likevel rakk KrF-kandidatane som svinga innom Helse i Hardanger AS laurdag 14. august, å få med seg dei viktigaste poenga frå styreleiar Stener Kvinnsland og assisterande dagleg leiar Sissel Aase Børve:

Tilbakemeldingane frå pasientane tilseier at den tverrfaglege «ekspressbehandlinga» fungerer godt for mange av dei. Tilbodet er så langt berre finansiert om lag ut året. Helse i Hardanger vonar å verta velsigna med offentlege refusjonsordningar.

Trengst lobby

Bodskapen er servert til eit lite koppel av politiske parti det siste året, og sist i rekkja var altså KrF. Beate Husa, helsebyråd i Bergen kommune og 5.-kandidat på lista til Hordaland KrF, seier ho fekk eit veldig godt inntrykk av verksemda i Øystese. Både fyrsteinntrykket — lokala og fasilitetane — og andreinntrykket — det faglege innhaldet — gjorde henne optimistisk på vegner av Helse i Hardanger.

— Dei har god kompetanse samla og ein måte å tilnærma seg krevjande problem på som eg synest verkar spanande og effektiv. Eg har store forventingar til resultata, og ser at dei allereie er lovande, seier Husa.

Ho trur Kvinnsland og kollegaene sjølve veit kva trådar det er smart å trekkja i, men meiner det var viktig at utviklingsminister og KrF-toppkandidat i Hordaland, Dag Inge Ulstein, som ligg an til å få fast stortingsplass igjen, fekk informasjon om drifta.

— Det er nok behov for lobbyverksemd. Då er det viktig at politikarane kjenner til det og at viljen til å løyva pengar finst, seier ho.

— Imponerande nyskapande

Også statsråd Ulstein meiner prosjektet i Kvam er imponerande nyskapande og sterkt fagleg fundert. Han trur at kombinasjonen av skreddarsydde, heilskaplege behandlingsopplegg og tett evaluering og forsking kan vera avgjerande for å utvikla gode behandlingsløp for diagnosar helsetenesta slit med.

— Kva kan KrF og det politiske miljøet bidra med i ei slik sak, spesielt når det gjeld finansiering etter 2021?

— Det er naturleg at me lyftar dette inn i diskusjonar om budsjetta. For min del verkar det klart at dette er eit tilbod som me bør utvikla. Då trengst føreseielege rammer for drifta.

— Må vera tydeleg

Den dagen KrF-kandidatane køyrde gjennom Kvam, vart dei møtte med avisoverskrifter som utropa partiet deira til det flest mislikar og det færrast likar. Slikt plagar korkje Husa eller Ulstein nemneverdig.

— Det har lite for seg å vera lika om folk ikkje stemmer på deg. Også andre parti opplever at mange mislikar dei. Av og til må ein vera tydeleg i kva ein står for. Eg gler meg veldig over målingar i det siste som viser ein positiv trend både i Hordaland og nasjonalt. Eg trur me skal nå sperregrensa og at me kan gjera det betre enn for fire år sidan, seier Husa.

Når HF spør henne kvifor KrF er ei viktig røyst i norsk politikk, deler ho svaret i tre:

• KrF er ein garantist for valfridom for barnefamiliar. Partiet vil halda på kontantstønaden og kjempa for tredelinga av foreldrepermisjonen.

• Partiet har nye løysingar i eldre omsorga, mellom anna pårørandestønad som kan gjera det mogeleg for eldre å bu heime lenger.

• KrF ser lenger enn Noreg og er oppteken av å føra ein bistandspolitikk som kan hjelpa fattige til sjølvhjelp.

Olsen framhevar i tillegg kampen mot fattigdom og klimautslepp, for ei uendra abortgrense og for offentleg stønad også til små trussamfunn.

— Det er altså mykje som står på spel, påpeikar han.