Pc eller nettbrett til alle elevar i grunnskulen er mellom ynska frå Kvam ungdomsråd.

Ber om pc til alle i grunnskulen

Ungdomsrådet i Kvam ber om pc eller nettbrett til alle elevar i 1.–10. klasse.

Publisert

Tiltaket vil redusera økonomiske skilnader mellom elevane, meiner rådet. Det går fram av ein uttale til det kommunale budsjettet for 2024 og økonomiplanen for 2024–2027. Rådet peikar her på nokre punkt som det meiner bør prioriterast i ei tid med økonomiske innstrammingar.

Ungdomsrådet er glad for at det i fjor vart vedteke å innføra eit dagleg måltid på ungdomsskulane. Vel å merka har formannskapet i ettertid tilrådd å venta med tiltaket.

Ungdomsrådet ber om at Kvam herad satsar på lærlingar innan til dømes elektro, mekanisk, bygg- og forskalingsfag, barne- og ungdomsarbeidarfag og helsefagarbeidar.

Kvam ungdomsråd er uroa over meldingar om mobbing på skulane. Ein bør satsa på samtalegrupper, meiner rådet. Utekontakten representerer ein ekstra tryggleik. Helsesjukepleiarane må verta meir tilgjengelege, skriv ungdomane.

Ungdomsrådet oppmodar heradet om å innføra gratis sanitære produkt for jenter i skulen, slik fylkeskommunen har gjort.

På felta kultur og idrett ber ungdomane om at «utstyrslageret» BUA vert realisert. Tilbodet fritidskort bør halda fram, meiner dei.

Ungdomsrådet er framleis ikkje nøgd med kollektivtilbodet i Kvam. Det er avgjerande at busstidene passar med undervisingstidene. Dette er i dag ei stor utfordring, særleg for dei som skal til utkantane av heradet og til Samnanger.

Rådet etterlyser betre kollektivtilbod på kvelden, natta og i helgane. Ungdomsrådet ynskjer at heradet prioriterer skredsikring og gang- og sykkelvegar der det ikkje er skuleskyss.

Når det gjeld budsjettet for Kvam ungdomsråd, ber ungdomane om at ramma på 150.000 kroner vert som før.

Laga med Labrador CMS