Ber om merksemd om biogass
Vil fylkeskommunen framleis satsa på å utnytta ressursane i akvakultur?
Det spørsmålet stiller fylkestingslem Sigrid Brattabø Handegard (Sp) før møtet i hovudutval for næring onsdag 22. mars.
Bakgrunnen for spørsmålet er at det i Tryglavik i Ullensvang er eit godkjent næringsareal i kommuneplanen. Arealbruken har vore gjennom demokratiske planprosessar i Jondal kommune, påpeikar politikaren. I haust sette Ullensvang kommune i gang detaljregulering av området. Enova har lova stønad til biogassprosjektet, der mellom anna fiskeslam skal nyttast som ressurs.
Ein del av den fylkeskommunale marine innsatsen, vedteken i februar, kan vera oppsamling av slam og gjenbruk i biogassproduksjon, noko fylkeskommunen i tillegg skal stimulera til gjennom tilskot, påpeikar Handegard.
I fråsegna frå fylkeskommunen 31. januar om planarbeidet vert det peika på sju område som bør vurderast. Ingen av desse gjeld marin innsats, ressursutnytting eller verdiskaping, emne som ville vore i tråd med vedtekne mål, meiner Handegard.
I fråsegna vert bruken av området i tillegg framstilt på ein måte som ein i liten grad kjenner seg att i lokalt, skriv ho.
