Ber om meir tid på Evjo

Føljetongen på Evjo held med andre ord fram. Då saka vart handsama sist, gav fleire folkevalde uttrykk for at det ville verta den siste dispensasjonen.

No ligg det likevel an til ein ny i rekkja, så sant lokalpolitikarar og overordna styresmakter er med på leiken. Årsaka er at næringsområdet på Skarpen ikkje er ferdig regulert og klart til bruk enno.

Ville ha press

Arealet på Evjo vert brukt til parkering og lagring av grus og stein, og det er ynskjeleg for verksemda å halda fram med det. Ifylgje søknaden vil Jan Mo lagra grus og stein fram til 31. desember i 2025, og ha parkering, omlasting og til dømes lagring av hengarar på arealet utan tidsavgrensing.

Ifylgje vedtaket om mellombels dispensasjon frå oktober 2021 skulle parkeringa og deponiet vore avvikla då fristen var ute 31. desember 2022. Rådmannen tilrådde å dispensera i fem år, men det var ikkje lokalpolitikarane einige i. Dei ville leggja press på både rådmannen og søkjaren.

Vedtaket gav difor ordre til rådmannen om å avklara med verksemda innan 30. juni i år korleis tidshorisonten er for flyttinga til det planlagde næringsområdet ved Skarpen. Det vart ikkje gjort. Fyrst i andre halvår har heradet drøfta saka med Jan Mo.

Skarpen-planen er ikkje ferdig. Nyleg fekk heradet aksept for fråvik frå vegnormalane, og rådmannen har sidan bede fylkeskommunen trekkja motsegna til planen.

– Har vurdert alternativ

Føresegnene til kommuneplanen seier at parkering og vegar kan inngå som ein del av næringsføremålet. Verksemda meiner at ein parkeringsplass som stort sett er i bruk i arbeidstida, vil medføra få ulemper for omgjevnadene. Ei utbygging i tråd med kommuneplanen, med bygningar, kan påverka mykje meir, meiner søkjaren.

I eit møte mellom heradet og verksemda kom det fram at arbeidet med reguleringsplanen har teke meir tid enn ynskt. Heradet gav dessutan tilbakemelding om at det ikkje var aktuelt å gje dispensasjon ved Skarpen.

Fleire alternativ er vurderte, men ei flytting til eksempelvis grustaket i Øystese vil vera svært problematisk, ifylgje Jan Mo. Ho vil mellom anna gje auka trafikk kring dei tre skulane. Det er dårleg vegstandard i Meierihola og vegen gjennom Vik er ikkje godkjend for vogntog. Dessutan er grustaket allereie i bruk, og ei flytting vil føra til stopp i anna arbeid, påpeikar søkjaren.

Innspel frå grannar

I eit svar på nabovarselet tek Øystese Båtlag, som sjølv har søkt om utviding av båthamna ved Evjo, til orde for fortgang i etableringa av industriområdet ved Skarpen. Båtlaget har forståing for at verksemda lyt halda fram på Evjo fram til næringsområdet ved Skarpen er klart, sjølv om båt og sand er ein dårleg kombinasjon.

Gule’s Mek og Landbruksverkstad AS meiner på si side at tida er inne for å avvikla parkeringa og deponiet. Verksemda hevdar at Jan Mo ikkje har fylgt opp vilkåra frå tidlegare vedtak. Opningstidene vert ifylgje innspelet ikkje fylgde, grus og støv vert ikkje fjerna frå hovudveg og innkøyrsel, støvreduserande tiltak er på eit lågmål og støvplagene er store. Gule’s meiner dessutan at avkøyrsla ikkje er bygd for store køyretøy, og at setningsmålingar ikkje er gjennomførte.

Nabo Jarle Bjørke skriv i sin merknad til søknaden at lite synest å vera endra sidan førre dispensasjonssøknad, anna enn nokre fleire betongblokker mellom grushaugane og opp mot pumpestasjonen. Han meiner alle partar vil vera tente med å flytta aktiviteten til ein meir eigna stad.

– Ta ansvar

Ifylgje Jan Mo sine kommentarar til nabomerknadene har båtlossing ved eit par tilfelle i haust halde på litt lenger enn opningstidene på grunn av forseinka båtar. Ved behov er det teke i bruk vatningsanlegg, og det er i tillegg utført salting av massedungar og parkerings- og lasteområdet, skriv verksemda.

I haust vart dessutan vegen og avkøyrsla asfaltert på nytt og utvida, skriv Jan Mo.

– Dette er aktivitet som ikkje skal liggja midt i bygda. Det er på tide at Jan Mo AS tek ansvar og sjølv finn løysingar som alle kan leva med og som er innanfor regelverket, skriv driftsleiar for Gule’s, Harald Bruhjell.