Ber om innspel til ny havbruksstrategi
Tidlegare i vinter varsla Fiskeri- og sjømatminister Odd Emil Ingebrigtsen at det til sommaren skal leggjast fram ein ny havbruksstrategi. No inviterer han til innspelsmøte om saka.
– Med havbruksstrategien ønskjer vi å staka ut kursen for framtida, og i dette arbeidet ønskjer vi god dialog med næringa og organisasjonane, seier statsråden i ei pressemelding.
Måndag 15. februar, tysdag 16. februar og onsdag 17. februar har Nærings- og fiskeridepartementet invitert næringa, organisasjonar og andre aktørar til digitale møte for å koma med innspel til den nye strategien.
Artikkelen held fram under annonsen.
Fiskeri- og sjømatministeren har tidlegare sagt at målet med den nye havbruksstrategien er å auka verdiskapinga i næringa, men at veksten samtidig må vera berekraftig.
Ifylgje E24 som skreiv om saka tidlegare, skal det å oppretta ei ordning som stimulerer til å slusa meir av norsk fjordoppdrett inn i lukka merdar, vera eitt av verkemidla som blir vurdert.
(©NPK)
