Ber om framleis brøyting

Vegen er ein av dei kommunale vegane som er på høyring i samband med eit framlegg om eventuell nedklassifisering eller privatisering.

Som nabo og tidlegare grunneigar i vegen vil Flatebø ved ei eventuell privatisering av vegen krevja at drenering og byggjefeil på vegen vert retta før private tek over ansvaret. Vegen er kommunal, medan grunnen er fylkeskommunal.

Flatebø meiner at dei involverte burde vore direkte varsla, då det truleg er svært få som har oppfatta at saka er på høyring.

Heradet brøytar i dag ein kommunal parkeringsplass på staden med «tungt» utstyr. Heradet brøytar også den kommunale vegstubben. Den private delen av Storeteigen vert i dag brøyta for hand av eldre bebuarar. Det er urealistisk at dei skal overta brøytinga av den kommunale vegen, meiner han. Resultatet er at seks bustader, der dei fleste eigarane er pensjonistar, må leiga brøyting, eller at det ikkje vert brøyt.

Viss vegen skal privatiserast, bør heradet setja vegen i den standen han var i før kommunen lengde vegen, meiner Flatebø. Då hadde den private vegen avkøyrsel direkte til fylkesvegen.

Vegstumpen er regulert, innløyst og driven som offentleg gangveg, opplyser øystesemannen.