Ber om at veg ikkje vert privatisert

Det er Flatabø Grunneigarlag som i eit høyringsinnspel til framlegget frå Kvam herad om å privatisera fleire kommunale vegar tek til orde for å gje vegane spesiell vurdering og omtale.

Dei to grusvegane går stort sett til fritidsbustader. Dei er viktige for mange som utgangspunkt for turområde.

Vegen til Botnen vert ikkje brøyta av heradet. Når det har vore behov for utbetringar, har ein måtta nytta lokale ressursar, som villig har stilt opp, skriv laget.

Rådmannen tilrår at heradet eig vegen fram til den kommunale skulehustomta, men at resten vert nedklassifisert.

I innspelet listar grunneigarlaget opp argument både for og mot privatisering. For talar det mellom anna at vegen er tungvint å driva og vedlikehalda og delvis ras- og flaumutsett, og at det stort sett er brukarar av hytter som nyttar vegen. Mellom motargumenta er lengda, det kommunale skulehuset og gjestebrygga, og at turgåarar og turistar nyttar vegen. Grunneigarlaget meiner det må vera lov å venta eit bidrag i retur for å yta til ymse aktørar og ålmenta, og minner dessutan om at heradet får store inntekter frå kraftutbygging som råkar Botnen.

Flatabø Grunneigarlag er overtydd om at kostnaden med å halda ein 1,7 kilometer lang veg til Botnagrenda er minimal. Vegen har stått seg bra sidan etableringa i 1959, og det har vore eit minimalt vedlikehaldsbehov, meiner laget, som synest at vegen bør vera kommunal så lenge det er næringsdrivande eller fastbuande på Botnen.