Ber om å få utvida oppdrettsanlegg

Talet på merdar i matfiskanlegget vil auka frå seks til ti, og anlegget vil verta lengt mot aust, om søknaden vert stetta. Maksimalt tillaten biomasse av laks og aure på staden er 1.560 tonn, og han vil vera uendra. Det går fram av eit brev frå fylkeskommunen til Ullensvang kommune.

Hovudårsaka til endringa er at oppdrettaren ynskjer færre fisk i kvar eining, noko som skal bidra til betre fiskehelse og -velferd. I tillegg vil ein med bruk av større areal få større spreiing av utslepp. Endringa inneber at fortøyingsarrangementet vert endra.

Ullensvang kommune skal vurdera søknaden, avklara tilhøvet til arealplanen, uttala seg og gjera vedtak. Kommunen skal òg leggja søknaden ut til offentleg ettersyn i fire veker. Merknader frå ettersynet og kommunen si handsaming av saka skal sendast til fylkeskommunen.

Regionkontora til Fiskeridirektoratet, Mattilsynet og Kystverket skal uttala seg i saka. Det skal også Statsforvaltaren, opplyser fylkeskommunen.