Ber fylket hugsa på kraftnettet
Kraftbehovet til den planlagde tunnelen frå Steinsdalen til Eikedalen bør avklarast tidleg i prosjektet.
Det skriv Alf Bjarne H. Steine, teknisk sjef og driftsleiar nett i Kvam Energi Nett (KEN), i eit straumbrev til Vestland fylkeskommune. Han ber om at behovet vert meldt til KEN, som er områdekonsesjonær.
KEN etablerer og driv fordelingsnettet i Kvam. Fylkeskommunen må ta høgd i planområdet for dei anlegga som det er naudsynt for verksemda å etablera og driva.
I god tid før utbygging må det avklarast korleis nye bygningar og veganlegg i planområdet skal forsynast med elektrisk straum, påpeikar Steine.
Ein må avklara i kva grad eksisterande leidningar eller kablar eventuelt skal nyttast, om nye leidningar må leggjast om, og om det er behov for nye nettstasjonar.
Den eller dei som utløyser tiltak i straumforsyningsnettet, må som hovudregel dekkja kostnaden med dei. Nye trasear må få rettar med minst like gode vilkår som dei eksisterande. Normalt er dette «evigvarande» bruksrettar, skriv den tekniske sjefen.
Om planen føreset at eksisterande høgspenningsanlegg må flyttast eller leggjast om, må det setjast av plass til ny trase og nettstasjonar. Eventuelle nye kablar eller luftleidningar som skal erstatta eksisterande anlegg, må minst ha overføringskapasitet som svarar til dagens kapasitet, skriv Steine.
Eventuelle ynske om omlegging av eksisterande anlegg må meldast til KEN i god tid. Omlegging kan vera ein tidkrevjande prosess, og det bør ein ta omsyn til i eventuelle føresegner om rekkefylgja av tiltak i planen, skriv driftsleiaren.
