Ber fylkeskommunen om å ta omsyn til turstiar
Reguleringsplanen for tunnelen mellom Steinsdalen og Eikedalen må ta omsyn til det omfattande rutenettet til Bergen og Hordaland Turlag.
Det skriv Bergen og Hordaland Turlag (BHT) i eit innspel til høyringa av oppstartsmeldinga for planen.
BHT skriv òg til Vestland fylkeskommune at ein, i den grad det er aktuelt, må sikra god og rimeleg parkering, toalett og boshandtering i tilknyting til dei ålmenne utferdsområda.
Turlaget meiner òg at ein må henta inn og vurdera kunnskap om korleis ulike tiltak påverkar friluftslivet. Mellom anna støy, utsyn, naturtypar og stikvalitet betyr mykje for naturopplevinga, og dette er viktig kunnskap å gjera synleg i arbeidet med å vurdera konsekvensane for friluftslivet.
BHT skriv at det innanfor plangrensa er område som ikkje eignar seg for steindeponi, sett frå ein friluftslivsståstad. Dette gjeld mellom anna starten på Skeiskvandalen, påpeikar laget.
BHT skriv at Kvamskogen er eitt av dei viktigaste friluftslivsområda i vår region, då han er mellom dei lettast tilgjengelege fjellområda for fleire byar og tettstader i regionen. Dei siste åra har naturen fått auka verdi som arena for friluftsliv og turisme, og gjennom dette auka verdi for folkehelse og økonomi. Naturopplevingar er spesielt viktige for den psykiske helsa.
– Me vonar difor at planen vil vera i tråd med dei overordna føringane frå berekraftsmåla, og vareta omsynet til natur og friluftsliv, skriv BHT.
BHT er med 30.000 medlemer den største friluftsorganisasjonen på Vestlandet.
