Ber for norske IS-born og -mødrer
Fire parti i Kvam går saman om å be om at fire norske IS-born og dei fire mødrene deira vert henta heim til Noreg.
Det skriv KrF, MDG, Raudt og SV i ein interpellasjon til møtet heradsstyret i Kvam 5. april.
Krigen i Ukraina medfører den største flyktningkrisa i Europa sidan 2. verdskrig. Europa og Noreg står klare til å hjelpa.
— Samstundes må me ikkje gløyma andre kriser, oppmodar partia.
Markeringa av kvinnedagen i Kvam sette fokus på norske IS-born og mødrene deira som er internerte i gruvsame leirar i Syria. Kurdiske sjølvstyre-mynde har bede om at nasjonane hentar heim sine statsborgarar. Tilhøva i leirane er svært alvorlege og legg til rette for dyrking av IS-ideologi. Fleire land hentar heim sine statsborgarar frå leirane i Syria.
— Me kan ikkje sjå på at born som er norske statsborgarar skal straffast for foreldra sine lovbrot, skriv partia.
Politikarane meiner heradsstyret bør vedta å oppmoda dei styrande om å henta dei norske borna og mødrene deira før borna vert meir traumatiserte, og at mødrene må stå til ansvar for sine handlingar i norsk rett. Vidare bør heradsstyret ynskja humanitær hjelp til leirane og hindra at dei vert radikaliseringsanstaltar.
