Ber folk vurdera å la bilen stå ved ekstra glatt føre
Kjenner du deg usikker bak rattet når det er ekstra glatt, bør du vurdera å la bilen stå om det blir underkjølt regn i jula, oppmodar NAF.
Ved underkjølt regn frys regndropane til is med ein gong dei treffer bakken. Det betyr at heile vegbanen blir dekt av eit tynt islag.
– Vegen blir rett og slett som ein skøytebane, slår NAF fast.
Artikkelen held fram under annonsen.
Det same skjer når regnet har frose på bakken om natta. Slikt føre er noko av det mest utfordrande som finst når ein skal køyra bil.
– Er du usikker på å køyra når det er ekstra glatt, vurder å la bilen stå når det er underkjølt regn, oppmodar senior kommunikasjonsrådgjevar Nils Sødal i NAF i ei pressemelding.
– Tilpass farten!
Rådet til NAF er elles å tilpassa farten.
– Dess høgare fart du har, dess vanskelegare blir det å takla bilen på glatt føre. Bremselengda aukar også. Det gjeld å ta det veldig roleg. Det viktigaste er å koma vel fram, seier Sødal i NAF.
Må du køyra bil på føre med underkjølt regn, tipsar han elles om at det kan vera lurt å venta litt før du legg ut på tur, slik at brøytemannskapa rekk å salta vegane.
Viktig med gode vinterdekk
Sødal minner elles om at det kan vera lurt å ta nokre bremsetestar for å testa veggrepet. Likevel kan det vera vanskeleg å oppdaga det tynne islaget på vegbanen før det er for seint.
– Skulle du mista kontrollen, hugs å ha begge hendene på rattet, brems alt du kan og styr som best du kan, oppmodar han.
For å vera best mogleg skodd for å køyra bil på isete vegar, er det best med piggdekk. Rådet til NAF er dessutan å reinsa dekka slik at ein får betre veggrep og i tillegg syta for å halda frontruta fri for is.
