Bedehus kan verta Fosse-hus

Det går fram av ein søknad om 430.000 kroner frå næringsfondet til Kvam herad.

Dei fem medlemene i gruppa har som mål å spreia kjennskap til og innsikt i det Fosse har skrive.

Bedehuset er i god stand og høveleg stort. Det skal fyllast med ulike arrangement og oppføringar.

Fossegruppa har samla alt ho har funne av artiklar, intervju, kritikkar, teaterplakatar og bøker med temaet Jon Fosse. Desse skal inngå i eit arkiv, både fysisk og digitalt. I Fosse-huset vil ein òg tilby ei skrivestove der forfattarar, dramatikarar og regissørar kan koma på inntil tre månaders opphald.

Skular har allereie teke kontakt for å lytta og læra om dramatikaren. Dei vil vitja heimbygda hans.

I juni fekk stiftinga tilbod frå indremisjonen om å kjøpa bedehuset til takst på 500.000 kroner.

Gruppa har eit budsjett på 633.000 kroner. Fossegruppa vil sjølv syta for 203.000 av kronene, og ber altså om 430.000 kroner frå kraftfondet.

I 2010 vart Fossestiftinga etablert. Sidan 2009, då Fosse fylte 50 år, har det vore årlege Fosse-dagar i bygda med tilreisande frå heile fylket. No etterlyser folk nye Fosse-dagar, ifylgje søknaden.

Bedehuset har i mange år stått på ynskelista til stiftinga over eigna lokale.

Fosse sjølv skal vera positiv til tiltaket. Han har hatt eit nært forhold til huset. I 2014 vart stykket Og aldri skal vi skiljast framført der. I diktet Sov de, mine kjære skriv Fosse om dei gamle konene og bedehuset. Mykje av litteraturen hans krinsar kring heimstaden.

Gruppa minner om at Jon Fosse er ein av våre største dramatikarar, han har fått mange internasjonale prisar og er på lista over kandidatar til Nobelprisen i litteratur.

Fosse bedehus står på gul liste i den kommunale kulturminneplanen. Ho er ei liste over miljø som har lokal kulturhistorisk verdi. Ho inneheld også område og bygg som kjem inn under kulturminnelova og plan- og bygningslova.