Båtlag vil betra bygg

Ny kledning og belysning står på planen. Målet er å betra tryggleiken, auka den estetiske verdien og energieffektivisera. Det skriv leiar i båtlaget, Jorunn Selvsik, i søknaden. Sørvisbygget vert brukt av både lokalbefolkninga og turistar.

– Skal me klara å drifta anlegget, er me er heilt avhengige av stønad for at det skal vera berekraftig for båtlaget, skriv Selsvik.

Ifylgje søknaden har kledninga råteskadar. Båtlaget har dessutan store utfordringar med toalett og kloakk. Toalett har gått tett ved fleire høve, til dels av ukjende årsaker. Det kan vera tømming av septik frå bubilar, noko som ikkje er tillate, skriv leiaren. Det er òg funne framandlekamar i toaletta. Båtlaget ser ikkje vekk frå at ei større oppgradering av røyrsystema kan vera naudsynt, og håpar å få unna anna naudsynt oppgradering om ei slik utgift skulle koma.

Båtlaget har søkt kommunen om 366.000 kroner. Det er summen for arbeidet, minus 20.000 kroner i dugnadsinnsats og 15 prosent eigenfinansiering.

Søknaden er send til ordninga «tilskot til leikeplass». På heimesida til Ullensvang kommune er det lista opp fleire punkt som er viktige for at eit prosjekt skal få tilskot frå ordninga. Leikeplassen skal vera open, tilgjengeleg og brukt av mange. Frivillige krefter skal bidra i prosjektet, og born og unge skal delta i planlegginga, for å nemna noko.

– Om dette tiltaket kjem under kriteria til tilskotsordninga, skal me diskutera når den tid kjem, skriv sakshandsamar Kari Selje til HF.

Søknadsfristen er 30. september.