Barske born isbadar i skuletida
Ei lita kuldegrad på land og nokre få varmegrader i sjøen såg ikkje ut til å skremma ein gjeng tøffe sjetteklassingar tysdag.
Då elevar på 6. trinn ved Norheimsund skule skulle i gang med sin andre undervisningstime tysdag, stod symjing på timeplanen. Men i staden for å hoppa rett uti det varme vatnet i bassenget i Hardangerbadet, pakka dei seg inn i handdukar og traska med raske steg ned mot stranda i Øystese.
Ved strandkanten gjorde elevane dei siste førebuingane før dei skulle uti det nokså friske vatnet. Medan nokre mota kvarandre opp med ein prat, tok andre ein spurt fram og tilbake langs stranda.
Sjå bilete frå årets fyrste utebad:
– Gjer oss sterkare
– Det er vanskeleg å koma seg uti når vatnet er kaldt, seier Luna Sophia Håvik Aarra.
Ho er ei av dei som sidan i haust har starta tysdagsøktene med ein dupp i Hardangerfjorden før symjeundervisninga har halde fram i bassenget.
Før ho vassa uti, var ho spent på korleis det ville gå. Kort tid etter var ho komen godt ut i sjøen, og berre hovudet var å sjå over vassoverflata.
Klassekamerat Knut Bernhard Vikøy fortel at han tykkjer det er positivt han og medelevane vert utfordra til å isbada.
– Dette gjer oss sterkare. Me får trena på noko me kanskje ikkje har så lyst til, men som gjev oss ei god kjensle etterpå, seier han.
Aron Bjelland seier at det kjekkaste med isbadinga er å koma inn etterpå.
– Du får ei ekstra varm og god kjensle i bassenget når du har vore ute fyrst, konstaterer han.
Duppen tysdag var truleg ein av dei kaldaste Bjelland har vore med på. Men litt erfaring har han med å bada i sjøen til ulike tider på året.
– Eg har nokre syskenborn som eg brukar å bada med når dei er på besøk, seier han.
Viktig med god pusteteknikk
Lærar og heilårsbadar Maria Øystese fortel at elevane har forskjellige strategiar for å koma seg uti det kalde vatnet. Nokre treng å varma opp litt på førehand, nokre spring rett uti og nokre tek det steg for steg.
– Det beste er om dei klarar å gå roleg uti, setja seg ned og fokusera på pusten, seier Øystese.
Tysdag kunne 12 av dei 16 elevane i 6A smykka seg med tittelen isbadar. For å vera isbadar lyt vatnet halda ein temperatur på under ti grader. Ifylgje Øystese er badetassen, eit røyr med ein sensor som måler temperaturen i sjøen, ute av drift. Dimed visste ikkje gjengen nøyaktig kor mange grader vatnet heldt.
– Men det er ikkje mange gradene. Nokre som bada på julaftan, fortalde at det var tre grader i sjøen då, seier læraren.
Mange av sjetteklassingane heldt ut i fleire minutt. Dei samla hendene over vassoverflata og pusta kontrollert inn og ut. Øystese forklarar at at det er lurt å halda hendene over vatn når det er kaldt. Ifylgje henne kan det verta ei meir ubehageleg oppleving dersom hendene vert kalde.
Dei aller mest vågale avslutta til og med badet med ein skikkeleg dukkert.
God og viktig øving
For gjengen i 6A nærmar det seg slutten på organiserte bad utandørs. Om nokre veker er det B-klassen som skal i gang med symjeundervisning, medan A-klassen skal ha kroppsøving.
– Dei får nok ein litt tøffare start enn dei som byrja med utebading i haust, seier Øystese.
Å verta van med å opphalda seg i vatn som held ein låg temperatur, kan ha fleire fordelar, meiner Øystese, som sjølv har vore heilårsbadar i tre år. Ifylgje henne får borna viktig trening i korleis dei skal ha kontroll over kroppen om dei skulle hamna i kaldt vatn.
– Dei får øva seg på korleis dei skal pusta, i tillegg til at dei får erfaring med korleis kroppen reagerer når han vert svært kald, fortel Øystese.
– Kva er det kjekkaste med opplegget?
– Det er å sjå gleda hjå elevane, og kor motiverte og spente dei er kvar gong. Det har vore artig å fylgja med på temperaturen. Då han kom under ti grader, kunne dei endeleg kalla seg isbadarar! seier Øystese.
Fyrste, men ikkje siste
I byrjinga hadde læraren med seg 10–12 elevar i kvar økt. Etter kvart som temperaturen fall, fall også talet på kor mange elevar som ville vera med, seier Øystese. Dimed var ho positivt overraska då ein så stor del av gruppa heiv seg med tysdag.
Øystese har ikkje undervist i isbading før. Ho vonar at opplegget med årets sjetteklasse er langt frå det siste.
– Det er kjekt å kunna gjera noko litt utanom det vanlege, seier heilårsbadaren.
Gjengen til Øystese er ikkje den einaste som badar utandørs dette skuleåret. Ifylgje læraren er det også ein gjeng femteklassingar ved barneskulen i Norheimsund som dristar seg uti det kalde vatnet når han har symjeundervisning.
