Bakeriet vann målprisen
Hardanger Bakeri fekk laurdag målprisen frå Kvam Mållag.
Målprisen vert delt ut til ei bedrift som bruker korrekt og god nynorsk i samband med marknadsføring og produkt. Håpet er å fremja bruken av nynorsk.
Bedrifta som vant i år, vart vald for nettopp dette. Under Siderfestivalen laurdag 5. oktober vart vinnaren annonsert.
Roger Aksberg Gjøsæter tok på vegner av Hardanger Bakeri imot prisen på scena. Han seier at bakeriet i Steinsdalen prøver å halda seg til nynorsk i det verksemda sender ut av informasjon og produkt. Og, seier han, det er kjekt å verta heidra for det når ein aktivt prøver å halda seg til nynorsk.
Tidlegare har nynorsken kome veldig naturleg med språket. No seier Gjøsæter at bakeriet kjem til å bruka nynorsk endå meir enn før. Han håpar at prisen oppmuntrar til bruk av nynorsk i lokale bedrifter, og vil gjerne sjå andre bedrifter gjera det same.
– Det ville vore bra om alle brukte nynorsk, seier han.
