Både varmt og kaldt

26,3 grader er den nye varmerekorden for målestasjonen på Jonshøgdi. Rekorden vart sett 5. september. Den gamle rekorden var på 24,8 grader og blei sett 15. september 2016. Det kjem fram av den klimatologiske månadsoversikta frå Meteorologisk institutt.

28. september var det klart for ny rekord på same målestasjon. Denne gongen i den andre enden av skalaen, då det vart målt -1,7 grader. Den førre rekorden på -0,6 grader var sett 27. september 2013. Det har vorte utført målingar på Jonshøgdi sidan 2006.

Kvamsøy ville ikkje vera dårlegare, og slo til med ein ny kulderekord. Det vart målt 3,6 grader 27. september. Den gamle rekorden, sett 17. september 2019, var 4,1 grader. Målingane på Kvamsøy starta i 2003.

Ifylgje månadsoversikta var september for det meste mild i Vestland. Det vart sett ny noregsrekord for september då det vart målt 30,6 grader i Etne. Det er fyrste gong det er registrert tropedag i Noreg i september.

For heile landet sett under eitt vart det registrert 15 prosent meir nedbør enn normalt, men det vart registrert mindre nedbør enn normalt både på Kvamsøy og på Jonshøgdi. Stasjonen på skisenteret på Folgefonna manglar nedbørstal for september, men i Øvre Krossdalen kom 268,1 millimeter nedbør.