BA: – Helland er ekskludert
Bjarte Helland frå Kvam er kasta ut av Industri- og Næringspartiet (INP), skriv Bergensavisen.
Saman med ein annan medlem vart han ekskludert frå partiet av sentralstyremøtet i INP torsdag kveld, skriv avisa. Dessutan er fylkeslaget Vestland INP oppløyst.
Helland har så langt representert partiet i fylkestinget og i Kvam heradsstyre. Han er politisk nestleiar i Vestland INP.
Artikkelen held fram under annonsen.
BA skriv at partileiinga har fått tilgang til eit konstruert varsel mot partileiar Ann Jorunn Hillersøy. Det skal vera laga for å sverta henne som leiarkandidat.
Grunngjevinga til sentralstyret for eksklusjonane og nedlegginga er fylgjande, ifylgje BA: «Saken inneholder varslinger, vedtektsbrudd, bekymringsmeldinger, brudd på partiets retningslinjer, manglende vilje til samarbeide, fremsetning av det som oppfattes som trusler mot enkeltpersoner i sentralstyret, motarbeidelse av partiet INP som en organisasjon, og offentlig handling som søker å skade partiet, partiets tillitsvalgte eller folkevalgtes omdømme.»
Helland, som skal vera representert av advokat John Christian Elden, seier til BA at vedtaket i sentralstyret er ulovleg. Han seier at han ikkje veit anna enn at det kom eit varsel mot Hillersøy før årsmøtet. Det vart sendt vidare til Finnmark INP for ikkje å handsama det i Vestland-laget.
Helland avviser at han har noko mot ei kvinne som partileiar.
