Avviste naboklage: – Invaderande
Kirsten og Arild McClellan Steine i Norheimsund ynskte mindre innsyn frå vindaugo i Kulturnaustet, men klagen deira er avvist.
Paret har klaga på eit kommunalt rammeløyve som Hardanger og Voss museum har fått til bygging av Kulturnaustet i det tidlegare Ica-bygget på nabotomta.
I andre etasje er det ein korridor med vindaugo som strekkjer seg langs heile lengda av kontordelen av bygget. Her vil det vera mogleg å sjå inn i husværet til paret. Det er òg planlagt eit kjøken og pauserom på «deira side» av bygget. Ekteparet meiner at ulempene for dei ikkje er tekne nok omsyn til. Ein vil lett kunna sjå utover plen, uteplass og inn i andre høgd, der det er soverom og bad. Dette vert opplevd som invaderande, skriv dei i klagen.
Må dra føre
Det er allereie sett i gang byggjearbeid. Dette har ført til at dei må trekkja føre gardinene heile døgeret både i matstova i fyrste etasje og i soverom og bad i andre etasje.
Rådmannen har konkludert med at fordelane for tiltakshavaren med gjenbruk og utvikling er større enn ulempene med innsyn.
– Dette argumentet kunne vore relevant dersom tiltakshavar faktisk gjenbruka til dømes vindaugo mot vår eigedom, men det har aldri vore vindaugo mot oss, påpeikar Steine i klagen.
Paret har òg merka seg at med unntak av den vestlege delen står berre ein stålkonstruksjon med tak att. Gjenbruken er ikkje så omfattande at ein ikkje kan ta omsyn til eksisterande nabohus, meiner klagarduoen.
Snåp avvising
Rådmannen handsama og avviste klagen på kort tid. Det inneber at Statsforvaltaren skal avgjera saka. Rådmannen meiner at ulempene med innsyn er «påreknelege ut frå plansituasjonen» og ikkje talar for mindre vindaugo i fasaden mot Steine.
Føremonene med gjenbruk gjeld ifylgje henne heile fasaden, så talet på vindaugo som vert bruka om att, har lite å seia, meiner rådmannen, som heller ikkje vil oppfylla ynsket frå klagarane om å reisa på synfaring før avgjerda.
Seniorkonsulent ved Hardanger fartøyvernsenter, Geir Madsen, seier til HF at senteret har teke omsyn til naboane i den grad ein kan venta. Han synest ikkje at det er ein kjekk situasjon at naboen ikkje er nøgd med eit prosjekt som har vore arbeidd med så lenge.
Vindaugo kjem der for å sikra lys i kontora i bygget, påpeikar Madsen. Det vil koma eit skjermande felt nedst i vindauga for å betra tilhøva for naboen. Han meiner senteret har gjort kva det kan for å tilpassa bygget og balansera det mot eigne behov.
