Avviser skjenketak

Arne Digernes, dagleg leiar og styreleiar i Naboen Pub AS, og tidlegare pubvert Bjarte Helland meiner Kvam herad bør innføra eit tak på kor mange gongar ein arrangør kan få einskildløyve til alkoholservering før ein krev at arrangøren skal ha eit regulært løyve. Dei to føreslår talet to i eit innspel til dei alkoholpolitiske retningslinene til Kvam herad, som no skal reviderast.

Verksemder og organisasjonar som driv regelmessig skjenking med einskildløyve, slepp unna lovpålagde utgifter knytte til mellom anna personell, noko som er konkurransevridande, skriv Helland og Digernes. Eit tak vil redusera dei økonomiske fordelane med «dugnadsarbeid» ved gjentakande arrangement med alkoholservering, skapa arbeidsplassar og sikra rettane til arbeidstakarar, skriv dei.

– Det finst dei som bør vurderast som profesjonelle arrangørar, men som nyttar einskildløyve for å unngå å måtta organisera verksemder og ha tilsette, skriv dei.

Dei meiner dessutan det bør innførast strengare kontroll med aktørar som nyttar einskildhøve, for å fjerna «bakdører», og at satsane i større grad bør differensierast ut frå kor mange gjester skjenkeløyvet gjeld.

– Fattigare tilbod

Arne-Kristian Glück-Teigland, eigar og dagleg leiar i Holmatun AS, meiner eit slikt tak vil skapa eit fattigare kulturtilbod i Kvam. Holmatun er ein hyppig brukar av einskildløyve. Glück-Teigland trur at talet var mellom eitt og to i månaden i snitt i fjor.

– Med eit slikt tak ville det vorte mindre tilbod til folk. Ein kan jo ha arrangement utan alkohol, men det er ofte ein del av pakken når ein arrangerer konsert, revy eller teater. I eit fleirbrukshus ville det vore vanskeleg å halda oppe eit pulserande kulturtilbod, seier han til HF.

Han meiner eit fast skjenkeløyve ikkje passar til konseptet Holmatun. Med fast løyve kan ein ikkje leiga bygget ut til lukka arrangement som opnar for at folk tek med seg drikke, til dømes bryllaup.

– Fast skjenkeløyve ville ha profesjonalisert verksemda og teke det litt vekk frå konseptet om eit hus for allmenta. Det vil eg ikkje, seier han.

Glück-Teigland påpeiker at han har 17 personar på løningslista og gjer ting etter boka.

Alkohollova opnar for at kommunen kan setta eit tak for kor mange einskildløyve ein kan ha. Rådmannen i Kvam meiner omfanget i heradet ikkje er så stort at det er naudsynt, men skriv at det er naturleg å følga med på utviklinga og vurdera forslaget ved neste revisjon.

Aktørane i heradet som har hatt mange einskildarrangement, betaler løyvegebyr for kvart løyve, og har såleis betalt meir i gebyr enn dei ville gjort om dei hadde normalt løyve, påpeiker rådmannen.

Rådmannen vil ikkje ta frå huseigarane høvet til å leiga ut lokala sine.

Tidlegare sidersal

Medan utestader i Ullensvang og Eidfjord kan servera brennevin til klokka 2 om natta, får gjestene i Kvam berre kjøpa drykk med inntil 22 % alkohol til klokka 00.30. Også i den andre enden er Kvam meir restriktive: Gjestene i Ullensvang og Eidfjord kan byrja å drikka til frukost klokka 8, medan dei i Kvam må venta til lunsj – eller i alle fall til klokka 12.

Sistnemnde grense føreslår rådmannen å liberalisera noko. Både Kabuso og Øystese næringslag har etterlyst ei slik liberalisering. Medan Kabuso ønsker tidlegare skjenking ved «enkelte høve», viser næringslaget til mat- og drikkefestivalar og 17. mai-frukost. Dessutan ønsker sidergardane å gi smaksprøvar til gjester på organiserte turar, som ofte kjem tidleg på dag.

Rådmannen vil komma ønska i møte og tilrår å legga til rette for at ein kan søka om å få servera alkohol til organiserte grupper frå klokka 9, og at ein kan søka om skjenkestart frå same tidspunkt i særskilde høve, til dømes på Siderfestivalen.

Omsynet til born og unge må likevel vega tyngst, meiner rådmannen, som vil setta foten ned for tidlegare skjenking på 17. mai. Rådmannen meiner generelt at opninga skal praktiserast restriktivt.

Politiet, som òg har uttala seg om planen, støttar vurderinga, og meiner at også julaftan bør vera unnateken frå liberaliseringa.

Tillèt færre vaktar

Ved skjenkeløyve for einskildhøve stiller heradet krav om minst to vaktar med gjennomført kurs og kunnskapsprøve for arrangement med under 50 gjester. Ved nokre høve har det vist seg å vera naudsynt med unntak, skriv rådmannen no. Han vil synleggjera det eksisterande høvet til å søka om dispensasjon frå minstekravet, som vert gitt etter tilråding frå politiet.

Rådmannen vil dessutan ha det skriftleg at heradet ikkje gir skjenkeløyve i kommunale bygg, med unntak for bebuarar og gjester i institusjonar eller bustader med heildøgns omsorgstenester. Dette er allereie eit eksisterande prinsipp i heradet.