Avviser bruk av ureine massar

Ullensvang kommune har vore på synfaring på eit område i Jondal som Handegard fekk løyve til å dyrka i mai 2018. Årsaka er at nokre naboar mistenkjer at Handegard har deponert massar på området utan løyve. Etter synfaringa bad kommunen Handegard gjera greie for kvar massane kom frå, kor mykje massar som vart brukt og om det er sikkert at massane var reine.

I rapporten frå synfaringa skriv kommunen at ein treng ikkje løyve til å bruka massar til å planera eit område som skal dyrkast, så lenge terrenget ikkje vert heva med meir enn tre meter. Regelverket krev derimot at massane er reine. Det vil seia at det berre vert brukt reine mineralske massar. Inneheld massane til dømes betong eller asfalt, er dei å rekna som avfall og skal leverast til eit deponi.

– Kommunen spurde

I eit svar til kommunen skriv Handegard at han ikkje nytta ureine massar. Han skriv at Oddmund Skeie i Folgefonn Entreprenør AS stod for arbeidet. I samband med arbeidet tok Skeie og Trygve Vik i Jondal kommune kontakt. Dei skal ha ynskt å bruka massar frå idrettshalltomta i Jondal til planeringa. Handegard tok ikkje prøvar av massane, men fekk opplyst frå kommunen at dei var reine og at alt var greitt.

Handegard la sjølv jord på massane. Det var matjord han hadde til overs etter at han grov ut tomt til ein ny driftsbygning i 2017.

Trygve Vik, som i dag er plan- og samfunnssjef i Ulvik kommune, var landbrukssjef i Jondal kommune fram til april 2018, og teknisk sjef ein periode etter det. Han kjenner seg ikkje att i påstandane til Handegard.

– Eg vil ikkje ha på meg at eg tok initiativ til å bruka massar frå idrettshalltomta på Byrkjeland. Massehandteringa var ikkje kommunen involvert i. Det var entreprenør Oddmund Skeie som frakta massane vekk, seier han.

Vik trur ikkje massane var ureine.

– Dette var massar som vart henta frå botnen på tomta. Massane låg heilt nede mot grunnfjellet. Dei var heilt urørte. Eg har ikkje tilgang til arkiva i Jondal lenger, og hugsar ikkje kor mykje massar det er snakk om. Det var ikkje store mengder, seier han.

– Jord og leire

Oddmund Skeie, som er dagleg leiar i Folgefonn Entreprenør, stadfestar at massane kom frå idrettshalltomta. Han hugsar ikkje nøyaktig når arbeidet vart gjort, og heller ikkje kor mange lastebillass som vart brukte. Han seier det var ei blanding av jord og leire, og at massane var reine.

– Kven tok initiativ til å bruka massane på Byrkjeland?

– Det hugsar eg ikkje. Det var sikkert Handegard.

– Hadde de løyve til å planera med desse massane?

– Eg forstod det slik at Handegard hadde løyve til å bruka massane. Eg hugsar ikkje alle detaljane no.

– Ingen kommentar

HF har spurt teknisk sjef i Ullensvang kommune, Randi Karin Habbestad, om ho kan finna ut kor stor mengd massar som vart nytta, om massane var reine og kva som vil skje vidare. Habbestad skriv i ein e-post at ho veit at HF har vore i kontakt med Vik. Ho har ingen kommentarar utanom det han har sagt.

Naboane som skulda Handegard for ulovleg deponering av massar, hevdar at arbeidet i det nydyrka feltet har ført til overvatn på deira eigedomar. I tilsynsrapporten har kommunen bede Handegard gjera greie for hans tankar om overvassproblematikken. Då denne saka vart skriven, var det ikkje registrert eit svar i postlistene til kommunen.

I ettertid har kommunen bestemt seg for å avslutta tilsynssaka, fordi årsakene til overvatnet «framstår som sammensatte og komplekse, og mye av sakshistorikken ligger langt tilbake i tid». Dessutan skal ikkje kommunen «i utgangspunktet» ta stilling til privatrettslege forhold. Dei private partane må såleis løysa saka mellom seg, meiner kommunen.

«Det er ikke mulig å komme videre i denne saken uten en nærmere avklaring av årsaksforholdene, som det vil føre for langt for kommunen å gå inn i», skriv kommunen.

Advokat Børje L. Hoff i Harris Advokatfirma AS meiner kommunen har gjort fleire sakshandsamingsfeil, og at saka skulle vore fylgd opp meir. Hans klientar meiner at årsakstilhøva ikkje er uklare. I eit skriv til kommunen opplyser han at klientane ikkje har vorte varsla om at kommunen har avslutta saka, men at dei fekk kjennskap til det heilt tilfeldig.