Avslo søknaden om hamneutviding
Politikarane vil ha meir detaljar på plass før ei eventuell utviding av båthamna i Øystese.
Det kom fram i møtet til miljø-, plan- og bygningsutvalet 31. januar. Utvalet vedtok å støtta rådmannen si tilråding om å avslå søknaden om dispensasjon og rammeløyve til utvidinga. Fordelane med tiltaket er ikkje større enn ulempene, meiner dei folkevalde.
I vedtaket viser utvalet til arbeidet med områdeplanen i Øystese. Dei folkevalde meiner at ein meir detaljert områdeplan vil gje grunnlag for byggjesøknad og ein sikrare veg til målet enn ein dispensasjon. Fleire overordna styresmakter har rådd heradet frå å dispensera frå plankravet i kommuneplanen.
Gjer ikkje opp
Leiar i Øystese båtlag, Nils-Ove Kvittingen, seier at han er skuffa over avgjerda, og at det ikkje er anna å gjera enn å ta henne til etterretning. Det er ikkje aktuelt for båtlaget å setja i gang med regulering på eiga hand, men laget vil likevel jobba for å utvidinga godkjend.
– Om det skal regulerast noko nytt på Vikevjo, må det verta eit samarbeid mellom alle aktørane der, seier Kvittingen.
– Me håpar sentrumsplanen kan hjelpa oss litt på veg no, seier han.
Les også:
– Positive, men
Vigdis Håland (Ap) meiner området kan verta veldig fint. KrF var positiv til tiltaket i seg sjølv.
– Me er absolutt positive til at båthamna ynskjer å utvida, og me ynskjer at dette skal verta ein realitet. Men me er òg einige i rådmannen si tilråding her. Det beste er å gå vegen om ein reguleringsplan, eller at ein går via områdeplanen for å koma litt raskare til målet, sa Hans Arne Børsheim (KrF).
Utvalsleiar Ottar Randa (H), som var innstilt på og fyrst føreslo å gje dispensasjon, slutta seg til fleirtalet og trekte framlegget.
