– Avgrensa kva tiltak som kan gjerast
– Parkslirekne kan høyrast litt ut som ei somatisk liding, men me får håpa det ikkje vert slik.
Utsegna stod Odd Valland Bovim (MDG) for i heradsstyremøtet 14. november. I eit spørsmål til rådmannen undra han om Kvam herad har ein plan for arbeid med naturmangfald og framande artar, som til dømes parkslirekne, det komande året.
Heradet varsla i 2018 ein større innsats over tre år på feltet, og fekk på oppmoding meldingar om ei rekkje observasjonar av parkslirekne på ulike stader i Kvam. Heradet prøvde sidan å få stønad frå Statsforvaltaren til føremålet, men mislukkast.
Difor har heradet oppmoda grunneigarar om å søkja og ta i bruk såkalla SMIL-tilskot til å gjennomføra tiltak mot planta på eigen eigedom. SMIL står for spesielle miljøtiltak i jordbruket. Våren 2024 kom det inn éin slik søknad, opplyste rådmann Anita Hesthamar i møtet.
Sjølv om det i nokre tilfelle vil vera trong for sprøytemiddel for å få bukt med planta, meiner heradet at også aktiv landbruksdrift med slått og beiting kan dempa spreiinga.
Ved til dømes kantslått langs kommunale vegar er det fokus på fare for spreiing, men avgrensa med aktuelle tiltak, opplyste Hesthamar.
– Når planta fyrst er etablert, kan det ta fleire år å nedkjempa henne. Planta må kuttast fleire gongar i året, og restane brennast og leverast til godkjent mottak. Også gjenveksten må handterast, sa Hesthamar.
Ifylgje henne kan heradet gjennomføra informasjonskampanjar og liknande for å hjelpa til, men heradet har avgrensa med ressursar til arbeidet. I kommunale prosjekt og gravearbeid vert det stilt krav om handtering av massane.
– Eg opplever at det rådmannen seier, er at om me feiar for eiga dør, har me kome eit stykke på veg. Og det er eit poeng, men eg trur dette vil verta ei utfordring som vil krevja heradet si merksemd ved prosjekt og eigedomsdrift også i framtida. Eg tolkar det slik at dette vil heradet fylgja med på, og det er positivt, svara Bovim.
