Avfall i renovasjonsbil tok fyr
Det enda godt og utan skade då boset i bosbilen til Steinar Hestvik fatna.
Hestvik køyrer for Bir Bedrift AS og skulle henta næringsavfall i Norheimsund måndag ettermiddag. Etter ei tømming på Sandven såg han at det byrja å ryka bak bilen. Fyrst lurte han på om det kunne vera byggjestøv, men det utelukka han raskt. Då vart fyrste prioritet å finna ein trygg plass der han kunne kvitta seg med det brennande avfallet.
Valet fall på grusbanen i Norheimsund, til glede for born i Norheimsund barnehage som kunne vitna det heile på trygg avstand. Det brann godt då bilen vart tømt og brannen fekk oksygentilgang, fortel sjåføren til HF.
Kvam brann og redning vart tilkalla. Ein brannbil kom til staden. Haugen med avfall – som romma alt frå bildelar til menneskehår – vart spylt med vatn og saumfaren med rive og handemakt for å avdekkja brannkjelda. Otten var at ein ulmebrann kunne blussa opp att. Kva som hadde fatna, var enno uvisst då HF reiste frå staden.
Hestvik seier til HF at han ikkje har opplevd liknande før, men at ein kollega av han har gjort det. Han mistenkte sjølv at eit litiumbatteri kunne vera kjelda.
Bir Bedrift er driftsselskapet til Retura Norge AS.
