Øystein Torsnes, fungerande politistasjonssjef i Hardanger politistasjonsdistrikt, fortel at det har vorte nytta mykje tid og ressursar til få, alvorlege sedskapssaker i 2021.

Auke i melde sedskapssaker: — Truleg fleire som melder frå

Større, alvorlege sedskapssaker kravde mykje av tida og ressursane til politiet i Hardanger politistasjonsdistrikt i 2021.

Publisert

Det opplyser fungerande politistasjonssjef Øystein Torsnes i Hardanger politistasjonsdistrikt.

Onsdag i førre veke la Hardanger politistasjon fram årstala for melde saker i 2021. Sedskapssaker skil seg klart ut i statistikken. Til saman 43 saker vart melde til politiet. I 2020 var talet 13. Ifylgje Torsnes er truleg nokre større, alvorlege saker årsaka til det høge talet.

— Men har hatt eit par—tre alvorlege saker, som igjen har genererert fleire nye saker. Det har vore med på å auka talet betydeleg, seier han.

Det har vore ein generell, stor auke på landsbasis i sedskapssaker, legg Torsnes til. Han trur at det kan vera fleire grunnar til det.

— Noko av grunnen kan nok vera at ein har vorte langt flinkare til å oppdaga og melda frå om mistankar om overgrep i til dømes skular, barnehagar og andre institusjonar. Dei som jobbar på institusjonane, har truleg meir kunnskap om korleis ein skal oppdaga og melda frå om denne typen saker, seier den fungerande politistasjonssjefen.

Færre narkotika- og trafikksaker

Medan talet på sedskapssaker har gått opp, har narkotikasaker gått ned med kring 30 prosent. Ifylgje Torsnes er det fleire grunnar til nedgangen. Noko av årsaka er ifylgje han at politiet har nytta mykje tid og ressursar på dei meir alvorlege sakene. I tillegg viser han til eit rundskriv frå Riksadvokaten.

— Me skal ikkje nytta tid og ressursar på dei tunge brukarane meir. Såleis har me hatt knapt hatt brukarsaker, seier Torsnes.

Nedgang har det vore også i melde trafikksaker. Ifylgje Torsnes har politiet fått færre saker trafikkstasjonen på Seljestad, og det har vore færre eigenproduserte trafikksaker.

I 2021 vart det meldt inn 536 saker til Hardanger politistasjon. Samanlikna med dei 647 melde sakene til dåverande Hardanger lensmannsdistrikt i 2020 har det vore ein nedgang på 17 prosent.

— Lang saksbehandlingstid

Den fungerande politistasjonssjefen fortel at han er nøgd med oppklaringsprosenten, som ligg på 69,7 prosent av alle saker. Talet er noko høgare enn i geografisk driftseining Hordaland, der 66,7 prosent av sakene vart oppklara. I Vest politidistrikt vart 50,7 prosent oppklara. Torsnes er òg nøgd med å ha oppklara 82 prosent av vinningssakene.

Ifylgje han er saksbehandlingstida på 105 dagar framleis for lang. Nokre av årsakene til den lange tida er mellom anna at enkelte saker trekkjer veldig opp, som til dømes miljøsaker og arbeidsmiljøsaker, og at noko skuldast venting på svar på DNA-prøvar og analysar. Han opplyser at det vert jobba med saka.

— Me vonar å få saksbehandlingstida betrakteleg ned, seier han.

Laga med Labrador CMS