Auke i bompengar for elbilar

Elbilistane køyrer meir og betaler mindre enn andre bilistar. Fleire bomstasjonar med elbilbetaling og lågare rabatt gir likevel auka bompengerekningar for dei som køyrer grønt.

Autopass-utferdar Fremtind Service har analysert bompenge- og ferjepasseringar for første halvår 2023. I første halvår 2022 betalte elbilistane i gjennomsnitt 172 kroner i månaden i bompengar, medan talet har auka til 259 kroner i 2023. Det er ein auke på 50 prosent. For alle bilistar, uavhengig av drivstofftype, auka bompengebetalinga i same periode frå 255 kroner til 309 kroner, noko som svarar til ein auke på 21 prosent.

– Auken er stor over heile landet, men i Møre og Romsdal og Troms og Finnmark er det ei dobling av elbilar med bombrikke i frontruta. Den sterke veksten i desse fylka kjem nok av innføringa av bompengebetaling i Ålesund og Tromsø i fjor haust og vinter, seier Svein Skovly, kommersiell direktør i Fremtind Service.

Gjennomsnittsbilisten passerer ein bomstasjon 29 gonger kvar månad. Elbilistane køyrer éin og ein halv gong så mykje og har i snitt 44 passeringar kvar månad.

(©NPK)