– Aukar ikkje trafikken
Ei ny hjelpekorpshytte ved Osen i Hamlagrø vil ikkje føra til auka trafikk i området, meiner Øystese Røde Kors Hjelpekorps.
Det går fram av merknader frå hjelpekorpset til fleire klagar på vedtaket 8. mai om å gje dispensasjon frå plankravet og byggjegrensa mot vassdrag for bygging av hytta.
Laget har fått avtale om å disponera to eksisterande parkeringsplassar ved Osen etter avtale med Parkeringslaget Hamlagrøosen, som er ein av dei som har klaga på vedtaket. Laget meiner to plassar ikkje held og at plassen plar vera full til dømes i påsken.
– Ikkje endra bruk
Om vinteren går det meste av transporten føre seg frå «Søreplassen», der korpset har tilgang til to plassar frå før, påpeikar hjelpekorpset. Det avviser at det plar vera fullt på plassen ved Osen i påsken.
– Det vert ikkje lagt opp til endra bruk av lagshytta, sjølv om denne aukar i storleik. Auke i storleik er fyrst og fremst med bakgrunn i å kunna ta betre vare på utstyr, ha meir utstyr tilgjengeleg og betra tilhøva for rekruttering gjennom betre fasilitetar, skriv Arne Lunestad i H2 Hardanger AS på vegner av søkjaren.
Parkeringslaget viser i klagen til at det ikkje er veg til den nye hytta, men snarare ei tørrlagd sone ved vatnet når det er nedtappa. Lunestad viser til at det har vore vanleg at fleire brukarar av hytter i området brukar «vegen» og parkerer langs vatnet.
Andre tema
Hjelpekorpset påpeikar elles fylgjande i klagemerknadene:
• All snøskuterbruk er knytt til øvingar, som er ein viktig del av beredskapsplanen til hjelpekorpset.
• 50 rutemeter av bruksarealet på 250 rutemeter er knytte til garasje og lager.
• Den gamle lagshytta har vore leigd ut til skular i mange år. Aktiviteten er liten.
• Å arbeida med integrering og med å leggja til rette for at funksjonshemma kan oppleva natur, står ikkje i kontrast til å ta vare på eit godt miljø i området. Føremonene er større enn ulempene for naboeigedomane.
