Auka kapasitet på internatet

Søkjartala til skulen er stort sett på det jamne, men det er fleire søkjarar som har sagt nei til studiespesialiserande i år samanlikna med fjoråret.

Det opplyser rektor Harald Voster.

– Eg forstår at yrkesfag har ein oppsving. Då er det naturleg at det går litt ned, seier han.

Elevane ved skulen er fordelte på tre klassar per trinn. På kvart trinn er éin av klassane ein idrettsklasse.

I alt er det plass til 245 elevar på internatet — 20 fleire enn i fjor. I fjor sommar søkte skulen om brakkeløyve, og brakkene kom på plass i desember.

Elles er rektor optimistisk før det komande skuleåret.

– Me satsar på eit godt skuleår. Det er alltid like spanande å sjå på elevsamansetninga, og sjå korleis elevane finn ut av det i gruppa. Det er også eit godt driv i kollegiet, seier rektor.

Laurdag kjem dei fyrste elevane på plass. Då er det VG1 som skal innlosjerast. VG2 og VG3 startar skuleåret sundag.