Augustregnet skremde ikkje båtturistane

Sesongen i august har vore vesentleg betre enn tidlegare, seier Hallvard Bjørgum, styremedlem i Norheimsund Rib Seafari. Etter ein liten nedgang i juni tok ribbtrafikken seg opp med ti prosent i både juli og august, fortel han.

Ifylgje Bjørgum har kundemassen endra seg. I år har det vore færre nordmenn blant passasjerane. Det har vore fleire asiatiske turistar enn tidlegare. Han trur asiatane, på grunn av pandemien, har reist mindre dei siste åra.

Det har vore nesten like mange passasjerar på turane i den norske fellesferien som det har vore i august. Sommarferien i Europa startar seinare enn i Noreg, så etterspurnaden er framleis god, seier Bjørgum. Ribbturane skal vera tilgjengelege for bestilling ut oktober.

Fleire turar enn nokon gong

Cruise og safari

Fleire landevegsfarande turistar har vore med på båttur i sommar. Mange av billettane har vore bestilte på førehand. Nettstaden Visit Bergen freistar turistar med mellom anna halvdagstur med fjordcruise og fossefallsafari.

– Turane frå Bergen er populære. Båtavgangane korresponderer med bussen. Etter båtturen kan turistane sjå Steinsdalsfossen, seier Bjørgum.

Dei to ribbane har vore i fast rute frå månadsskiftet mai–juni. Bjørgum er nøgd med sesongen til no, men seier at han skulle ynskja selskapet fekk nytta kapasiteten betre. Turane går anten det er to eller ti passasjerar om bord.

– Mange planlegg turane allereie i januar, og då må dei kunne stola på at turen ikkje vert avlyst, seier han.

No har alle faste turar den same ruta. Tidlegare hadde selskapet fleire å velja mellom, men då vart det mange spørsmål om kva som var den beste turen. På ruta er det faste stopp der turistane får høyra historie frå fjordbygdene, mellom anna frå tida då fjorden var vegen og om felemakarane frå Botnen. Ifylgje Bjørgum er høgdepunktet for turistane å koma tett på landskapet i Fyksesundet.

– Det er spesielt for folk å sjå høge fjell og fossefall så tett på, seier han.

– Ingen har bede oss stoppa

August baud på mykje regn, men det set ingen stoppar for båtturismen. Bjørgum fortel at reisande frå område med tørke og lite regn føler dei er med på ei ekstremoppleving i regnvêret. Passasjerane har på heildekkjande drakter, men dei får kjenna naturen på kroppen. Han fortel at turistane likar å verta våte i håret og på beina.

– Å sitja i ein open båt i fart og kjenna regnet piska mot andletet, er ganske spesielt. Dei likar å sjå vatnet som fossar nedover fjellsidene ved Botnen. Det er det dei betalar for, seier Bjørgum.

Både born og eldre på opptil 80–90 år har vore med på tur. Nokre er redde for at det skal gå for fort, men turane skal ikkje skremma folk.

– Ingen har bede oss om å stoppa, senka farten eller setja dei på land. Dei som er spente på førehand, kosar seg på tur, seier Bjørgum.