Åtvarar om urovekkjande ulukkestal på lett motorsykkel

Lett motorsykkel er populær blant ungdom, men talet på omkomne og hardt skadde som følgje av det populære køyretøyet aukar. Foreldre må vere klar over farane lett MC inneber, meiner Trygg Trafikk.

Dei siste vel 20 åra viser tal frå Trygg Trafikk at av dei som døyr eller vert hardt skadde på lett motorsykkel, er heile 63 prosent 16- og 17-åringar. I same periode har talet på drepne og hardt skadde 16- og 17-åringar på lett motorsykkel auka med 58 prosent.

Så langt i år har tre ungdommar mista livet på lett MC. Menn utgjer 90 prosent av alle som døyr på lett motorsykkel.

– Utviklinga er skummel. Og sjølv om andelen hardt skadde er langt større enn dødsulukkene, er det viktig å hugse at det kan vere snakk om skadar unge menneske må bere heile livet, seier Bård Morten Johansen i Trygg Trafikk.

Trygg Trafikk mistenkjer at mange foreldre ikkje tek innover seg risikoen med køyring av lett motorsykkel.

– Det er feil å tru at dette er ein litt avansert moped. Tvert imot veit vi at risikoen er fem gongar så høg for å bli hardt skadd som på moped. Lett MC kan du køyre i svært høg fart og det kan vere krevjande å handtere. Ungdommens glede over fart kombinert med manglande risikoforståing, kan føre til farlege situasjonar, seier Johansen.

– Det er fleire moglege verkemiddel som bør bli vurderte. Det kan dreie seg om å sjå på motoreffekten, innføre prikkbelastning, heve aldersgrensa eller regulere på andre måtar. Det som er sikkert, er at vi ikkje kan sitte stille og sjå på at ungdom døyr i trafikken, avsluttar Johansen.

(©NPK)