Åtvarar mot svindelforsøk med bruk av telefonnummeret til politiet

Personar over heile landet opplever å bli ringde opp av nokon som gir seg ut for å vere frå politiet.

Eininga til politiet for vandelskontroll og politiattestar har fått melding om forsøk på svindel, der folk blir oppringd med telefonnummeret i eininga, opplyser politiet i ei pressemelding.

Ved eit tilfelle har den som ringjer gitt seg ut for å ringje frå Økokrim og ved eit anna tilfelle frå Bank Norwegian.

Ann-Karin Dahl Næss, leiar ved eininga ber innbyggjarar vere merksam viss nokon ringjer frå 40 40 15 50, det er ikkje sikkert det er frå politiet.

Folk over heile landet har også vorte ringt frå eit nummer politiet i Fosen har, skriv Fosna-folket.

– Politiet tek ikkje kontakt med folk for å seie at nokon prøver å ta opp lån i deira namn. Dette er heller ikkje eit telefonnummer som politiet ringjer ut frå, seier politistasjonssjef Hallgeir Stjern ved Fosen politistasjonsdistrikt til avisa.

– Svindlarane seier at dei ringjer frå Rissa lensmannskontor. Det er det ikkje noko som heiter, det eksisterer ikkje, seier Stjern vidare.

Han oppmodar alle til ikkje å gi frå seg personopplysningar over telefon.

(©NPK)