Årets nynorskkommune?

Det opplyser Språkrådet i ei pressemelding torsdag. Konkurrentane til heradet er kommunane Bergen, Stad og Vinje, og Vestland fylkeskommune.

Prisen går til ein kommune eller fylkeskommune som legg godt til rette for nynorsken. I år vil juryen sjå særleg positivt på fylkeskommunar eller kommunar som har sett i gang tiltak for å stetta krava i den nye språklova, som kom 1. januar 2022.

Språklova fremjar mellom anna likestilling mellom bokmål og nynorsk, og sikrar vern og status for dei andre språka som staten har ansvar for: kvensk, romani, romanes, samisk språk og norsk teiknspråk.

Pengar til språkarbeid

Fjorårets vinnar var Ål kommune. I år er premiesummen dobla. Grunnen er at Kulturdepartementet går over til å dela ut prisen annakvart år.

Ifylgje Helene Urdland Karlsen, seniorrådgjevar i Språkrådet og jurysekretær, er det ikkje knytt noko spesifikt krav til bruken av pengane. Men tidlegare år har pengane gått til språkarbeid.

Vinje kommune, som vann tevlinga i 2018, brukte pengepremien til å omsetja Veien til førerkortet til nynorsk. Ålesund vann året etter og nytta pengane til intern norskopplæring i den nye storkommunen, fortel Karlsen.

Tidlegare måtte kommunane og fylka sjølve nominera seg til konkurransen, opplyser ho. No kan kven som helst nominera sin kommune eller sitt fylke. Dei nominerte vert så spurde om dei ynskjer å vera med, og lyt svara på ein del spørsmål.

Klart språk

I 2015 lanserte Kommunenes sentralforbund (KS) eit nasjonalt program for klart språk i kommunesektoren. Året etter var Kvam herad sin eigen, åtte sider lange språkprofil klar.

Profilen seier mellom anna at Kvam har valt klart språk som sin språkstil. Ifylgje profilen skal eit klart språk vera eit korrekt, klart og mottakartilpassa språk som set lesaren fyrst og legg vekt på handling. Klart språk gjer at mottakarane forstår og finn det dei treng, og kan bruka informasjonen til å gjera det dei skal gjera.

Kulturminister Anette Trettebergstuen skal dela ut prisen i hovudstaden måndag 24. oktober.