– App til ulempe for dyr
Kan Postkassetrimmen og liknande appar vera eit trugsmål mot faunaen?
Tarjei Aalvik påpeika i folkemøtet om nasjonalpark 28. september at appar som Postkassetrimmen fører til auka trafikk i område det tradisjonelt ikkje er mykje trafikk i. Dimed mistar reinsdyra i fjella våre fristader som dei plar oppsøkja, og dyra veit ikkje heilt kvar dei skal gjera av seg, sa Aalvik.
– Kan me verna oss mot det? spurde han.
Leiar Helene Ødven i Bergen og Hordaland Turlag ville ikkje ta ansvar for den nemnde appen, berre for nettenesta ut.no og turopplegget Kvam i kryss og krakje.
– Eit veldig godt innspel. Me kan ikkje ha trafikk overalt, sa Ødven.
Ho understreka at turlaget ikkje er ein kommersiell aktør og ei pengemaskin, men oppteke av å ta vare på dei siste urørte områda. Turlaget har såleis ikkje reknestykke som syner belegget i hyttene sine. Overnattingstala syner at det er mykje ledig kapasitet, ifylgje Ødven.
Ordførar Ivar Kvalen (Sp) i Luster kommune meiner at kommunar som har reinsdyr, bør ta ansvar for å gje plass til villreinen.
– Han kom vel akkurat før oss til landet. Det er vel difor me er her. Om ein kan gjera livet litt lettare med vern eller på annan måte, tykkjer eg det er bra, sa han i folkemøtet.
