Anonyme jordomseglarar
Eigarane av seglbåten «Zemi» ville ikkje vera med på bilete og ikkje seia etternamnet sitt.
Men svenskane tykkjer det er «jättefint» i Norheimsund, der dei låg i båthamna frå sundag til måndag. Jomfruturen tok til i Jakobstad i Finland, der båten vart sjøsett frå verftet Baltic Yachts OY AB LTD.
Skuta er 110 fot lang og 8 meter brei, og masta er 53 meter høg. Båten veg 95 tonn. Det største seglet er på 1.100 rutemeter.
– Det er stort, seier Cilla, ein av dei åtte familiemedlemene som held til om bord.
Fleirårig prosjekt
Familien har halde på med prosjektet i tre år. Seglarane byrja prata om det allereie for tjue år sidan, då dei gjorde si fyrste reise til Stillehavet. Dei ville gjera det ein gong til.
Båten, ein Baltic 110 Custom, er teikna av ein båtarkitekt i tråd med eigarane sine idear. Familien har vore med på heile byggjeprosessen.
Det tok svenskane fire dagar å gå til Kristiansand. No har dei vore rundt på Vestlandet – mellom anna til Stavanger, Ulvik, Odda og altså Norheimsund.
Det er bra å vera i Hardanger, for her kan dei ta det med ro medan dei lærer båten å kjenna, seier Cilla.
Familien var i Stillehavet seinast i 2016. Covid-pandemien hindra gjengen i å føreta ei planlagd reise dit i 2021.
– Så dit skal me no, har me tenkt, seier Cilla.
Går på straum
«Zemi» er den fjerde båten til familien. Namnet kjem frå steinskulpturane som eit urfolk i Karibia har brukt for å freista ta vare på forfedrane.
– Dei samla fedreåndene for å få tryggleik og lukke og ha familien med seg. Difor tykte me at «Zemi» var eit bra namn, seier Cilla.
Båten er batteridriven og har i tillegg to dieselgeneratorar.
– Han er som ein Tesla, men på vatn. Me har soltak med solceller, så me kan forsyna oss sjølve med kraft. Det er bra at ein kan laga sin eigen energi når me er ute, om det skulle henda noko, seier Cilla.
Kapteinen heiter Kippa, og han er ein svært røynd seglar, ifylgje henne. Cilla og kona til Kippa hjelper kvarandre med matlaginga om bord.
Dei likar seg i Norheimsund. Det regnar når HF er innom, men familien har hatt sju dagar med fantastisk vêr. «Jätte-jättefint», seier Cilla.
Seglarane har ikkje vorte ute for noko dramatisk så langt, og båten kjennest svært trygg. Alt går bra, seier ho. Neste stoppestad er, igjen, Ulvik.
Skal delta i regatta
Ifylgje boatinternational.com har «Zemi« skrog av karbonfiber og dekk av teak. Bygginga tok til i fjor på oppdrag frå «ein svært erfaren familie som ynskjer å segla verda rundt». Båten er designa av Malcolm McKeon. Interiørdesignet vart utført av Andreas Martin-Löf.
Henry Hawkins, visepresident i Baltic Yachts, seier til nettstaden at det har vore ei bylgje av kundar som ber om elektrisk framdrift og andre miljømedvitne løysingar.
– Me er opprømte over å kunna byggja ein båt med det siste innan teknologi som tener eit reinare, grønare miljø, seier han.
Boatinternational.com skriv at «Zemi» vart testa utanfor Jakobstad i sommar.
Skuta vil etter planen snart gå nordover til Island, før ho rettar baugen sørover mot Skottland. Deretter vil ho gå til Kanariøyane og kryssa Atlanteren til Karibia, der seglarane planlegg å konkurrera i konkurransen St Barths Bucket regatta i 2024.
