— Anlegget er ganske ruvande

Onsdag i førre veke var takstingeniør Helge Fjellro henta inn for å forklara seg i Hordaland tingrett i tvistesaka om båthamna i Skutevik i Tørvikbygd. Fjellro var på synfaring på staden i august i fjor, og hans vurdering av situasjonen er at båthamna gjer til at ikkje alle kan nytta eigne anlegg. Han meiner dessutan at verdien på eigedomane til alle saksøkjarane har vorte svekt.

— Kva var det du såg på synfaring og la vekt på? spurde advokat Magnus Hovda Bergesen for saksøkjarane.

— Anlegget er ganske ruvande i bukta. Reint takstfagleg tenkjer eg at det har store konsekvensar for eigedomane som ligg der, i alle fall marknadsmessig, svara Fjellro.

— Det er ikkje ein menneskerett å ha båtplass i Tørvikbygd

Verditap

I retten sa Fjellro at han trur at nokre mistar lysta på å kjøpa ein eigedom i Skutevik etter at båthamna kom.

— Eg vil tru at dei som ynskjer å kjøpa seg ei strandline, også vil rå over strandlina og båtfesteretten eller moglegheita for å leggja ut ei bryggje.

I ein takstrapport seier Fjellro at grunneigarane bør kompenserast for eit verditap på 260.000 kroner eller meir. Summen varierer frå eigedom til eigedom.

Fjellro vart spurd om bølgjebrytaren vil gagna eigedomane. Han svara at eventuelle føremoner har lite å seia dersom grunneigarane ikkje kan ha båtane sine liggjande ved eigedomen på grunn av plassmangel.

– Mykje påverkar navigering

— Gjev le

Båtlaget hadde henta inn takstmann Andreas Eriksen frå Takst & Byggmester Eriksen AS som sakkunnig vitne.

I ein rapport skriv han at båthamna ikkje direkte reduserer verdien av nærliggjande eigedomar. Eriksen meiner at bølgjebrytaren vernar eigedomane mot høg sjø, som i praksis legg til rette for ei betre og meir funksjonell strandline for eigedomane.

— Eg ser ikkje det direkte verditapet. Det er basert på bølgjebrytaren som gjev meir le. Reint teknisk er det ferjesambandet som svekkjer området med lastebilar på ferjekaien og slikt. Eg observerte òg då eg var der at brytaren vart nytta av mellom 10 og 15 personar som brukte staden til rekreasjon, sa Eriksen i retten.

— Ei endring

Eriksen si vurdering er at saksøkjarane ikkje har mista tilflotsretten, men at tilfloten er endra gjennom at måten å koma seg inn og ut på er ny.

I rapporten sin skriv han at retten «til å komme uhindret til og fra strandeiendommen med båt er etter endt synfaring ikke forringet pga. marine anlegget. Det er observert en skute ved gnr. 87, bnr. 24 som hindrer adkomst for nordlige grunneiere per d.d.». Denne båten er «Kristianna», som tilhøyrer Geir Øystein Djupevåg.

— Korleis heng den konklusjonen saman? spurde advokat Bergesen.

— Hadde ikkje den skuta lege på tvers, slik ho gjorde på synfaringsdagen, så hadde båtane også på dei inste eigedomane kome til. Det er skuta som fysisk sperrar tilflotsretten til dei inste båtane, svara Eriksen.

— Under føresetnad av at skøyta ligg der lovleg — vil du då seia at dei inste eigedomane er svekte? heldt advokat Bergesen fram.

— Om ho ligg der lovleg, så har ein eit problem. Då kjem ein ikkje til dei inste plassane, svara Eriksen.