– Anerkjenning til arbeidet vårt
Førre veke var ei god veke for Helse i Hardanger AS. Det sørgde ein artikkel i eit anerkjent tidsskrift og to Dam-tildelingar for.
Helse i Hardanger tilbyr mellom anna ei behandling til pasientar med «long covid». Førre helg vart det klart at tidsskriftet Nature Scientific Reports har publisert ein artikkel om behandlinga. Som om ikkje det var nok, vart det torsdag klart at verksemda i Øystese har fått pengar frå Stiftelsen Dam både til å utvikla covidbehandlinga og til eit tilbod til pasientar med seinverknader etter kreftbehandling.
– Heng høgt
Gerd Kvale er professor i klinisk psykologi og spesialrådgjevar i Helse i Hardanger. Sjølv om artikkelen er eit samarbeid mellom fleire, er ho hovudforfattar, eller såkalla anker, bak teksten.
Ifølgje Kvale er Nature Scientific Reports eit av dei internasjonale vitskapelege tidsskrifta som har størst nedslagsfelt.
– Å få publisert noko i tidsskriftet heng høgt. Før noko vert publisert i Nature Scientific Reports, vert det granska av topp internasjonale fagfolk. Arbeidet vårt har altså blitt granska av andre, og dei har kome fram til at det me held på med, er relevant og viktig, seier Kvale.
Gjev anerkjenning
Høgt heng også tildelingane frå Stiftelsen Dam. Ifølgje stiftinga si eiga internettside forvaltar den 6,4 prosent av overskotet til Norsk Tipping. Stiftinga gjev pengar til helse- og forskingsprosjekt.
Helse i Hardanger fekk 1,5 millionar kroner til covid-forskinga og 1,4 millionar kroner til forskinga på behandling av seinverknader etter kreft. Pengane skal i hovudsak gå til å gje fleire pasientar plass hos Helse i Hardanger.
– Pengane er viktige, men den anerkjenninga det gjev å få støtte frå Stiftelsen Dam er like viktig. Folk byrjar for alvor å få opp augo for Helse i Hardanger. Me vert stadig oftare kontakta av fagfolk frå andre institusjonar som ønskjer opplæring i det me driv med. Representantar for Helse i Hardanger er inviterte til alt som er av rehabiliteringskongressar i Noreg det neste året, seier Kvale.
Mikroval-behandling
I tillegg til behandling av long covid tilbyr Helse i Hardanger behandling for pasientar med angst og depresjon, ryggplager, diabetes type 2 og kols. Konseptet til Helse i Hardanger vert gjerne kalla konsentrert, mikro-val basert behandling.
Ifølgje Kvale har ein henta det beste frå ulike behandlingsformer og sett det saman til noko nytt og unikt.
– Det fantastiske med Helse i Hardanger er at me har skapt ei generisk tilnærming på tvers av ulike lidingar. Me gjev pasientar med heilt ulike helseplager konsentrerte og kunnskapsbaserte behandlingar som er skreddarsydde for kvar pasient, samstundes som behandlingane har mange likskapstrekk, seier Kvale.
Behandlingane er bygde over same leist. Pasientane får konsentrert behandling i ei lita veke hos Helse i Hardanger, før dei får ein periode med digital oppfølging.
– Eit vegskilje
Dagleg leiar i Helse i Hardanger, Sissel Aase Børve, fortel at Helse i Hardanger er ved eit vegskilje. Verksemda har to einingar. De eine er ei forskings- og utviklingseining der klinisk behandling vert nytta til å samla data. Fram til no har berre denne eininga vore i drift.
Verksemda har òg ei driftseining. Vona er å få denne i gang dei neste månadene. Helse Vest kjøper rehabiliteringstenester frå fleire private aktørar. Desse tenestene er for tida ute på anbod.
– Me har levert inn tilbod på fleire tenester. Om me får oppdrag frå Helse Vest, hadde det vore optimalt for oss. Å driva med prosjekt, slik me har gjort til no, er greitt, men det å ha ei driftseining som leverer gode helsetenester til mange, har alltid vore målet til Helse i Hardanger, seier Børve.
Helse Vest kan velja å takka ja til heile, delar av eller ingenting av tilbodet frå Helse i Hardanger. Når det vert avgjort, er førebels usikkert.
– Me veit at det ikkje vert bestemt før på den andre sida av sommaren. Meir veit me ikkje, seier Børve.
I skrivande stund tek Helse i Hardanger berre imot nye pasientar til kols-behandlinga, sidan ein har prosjektmidlar att. Verksemda har kapasitet til å behandla om lag tusen pasientar i året.
– Kva skjer om de får avslag frå Helse Vest?
– Då må me jobba med alternative planar for driftsfinansiering, seier Børve.
