– Alvorleg brot på personvernet
Menneskeleg svikt var årsaka då dei føresette til borna i ein barnehage i Ullensvang fekk ei melding dei ikkje skulle hatt 27. april.
Det går fram av ei avviksmelding til Datatilsynet frå barnehagestyraren.
Meldinga hadde i eit vedlegg ei setning med ei personopplysing om eit barn, og vart send til fleire foreldrepar. Ti foreldre las meldinga, som vart send i datasystemet barnehagane nyttar. Meldinga vart oppdaga same dag og vart «inaktiv» ved midnatt, opplyser styraren.
Styraren skriv at hendinga var svært ubehageleg for dei involverte partane. Det var vanskeleg å vita at meldinga ikkje kunne gjerast inaktiv før. Leverandøren har informert om at det ikkje var mogleg, skriv styraren.
For å hindra at hendinga gjentek seg, lovar styraren å ta opp jamleg ansvaret dei tilsette har for personvernet til borna og dobbeltsjekka alle fellesmeldingar som vert sende til foreldra. Leiaren vil ta opp på leiarnivå i kommunen om ein kan godta at det ikkje er mogleg å sletta meldingar som er publiserte, og dessutan ha dialog med leverandøren om saka.
For å redusera potensielle skadeverknader, kontakta barnehagen den råka føresette straks ein vart klar over kva som hadde skjedd. Barnehagen har bede om orsaking til både vedkomande og til foreldra som har lese meldinga, og har omtala saka som eit alvorleg brot på personvernet.
