Alt er klart for halvering av bompengar
— Eg forventar at Ferde reagerer raskt og at folk som skal til Kvamskogen på påskeferie, kan betala 25 kroner.
Det seier fylkestingsrepresentant Sigbjørn Framnes. Han veit ikkje kor lang tid det vil ta før eit endeleg takstvedtak om Kvammapakken kan vera gjort i Vegdirektoratet, men meiner det bør vera mogeleg å klara det minimum før den neste høgtida.
— Når andre har klara dette for lenge sidan, bør Ferde jobba så raskt som råd er og prioritera saka, seier Framnes.
Fylkestinget stilte seg framleis bak framlegget til nye takstar, som på kort varsel vart lagt fram for organet etter at saka vart teken opp i fylkesutvalet i førre veke. Taksten ser ut til å verta 25 kroner for småbilar og 33 kroner for tyngre køyretøy.
Framnes rosa i møtet administrasjonen for å arbeida raskt med saka den siste veke. Bompengeselskapet Ferde AS fekk derimot litt pepar, etter at selskapet fyrst avviste å leggja fram saka fordi det meinte dette ikkje høyrde til oppgåvene. Ferde gjorde eit unntak for Kvammapakken-saka, etter at selskapet fekk sterk kritikk i fylkesutvalet.
— Eg er glad for at fylkesrådmannen har lagt press på Ferde og fått selskapet til å skrinleggja diskusjonen med departementet, og ta det opp i eit anna forum. Han har gjort ein kjempejobb når fyrst så gale var, seier Framnes.
Han seier løyvinga av 138,5 millionar til reduksjon av gjelda i Kvammapakken var ein viktig siger for Frp i budsjettdebatten på Stortinget, og meiner det berre skulle mangla at vedtaket vert gjennomført raskt.
