– Ålmenta må få tilgang
Planutvalet og formannskapet var samde då eit høyringsinnspel om utbygginga ved Bjølsegrøvatnet vart drøfta denne veka.
Få spørsmål vart stilte frå dei folkevalde då Heidi E. Ørjansen, leiar for eining for plan og byggjesak i Kvam herad, onsdag orienterte planutvalet om prosjektet. Kort sagt meiner Noregs vassdrags- og energidirektorat at dammen ved Bjølsegrøvatnet er mogen for utskifting. I samband med bygging av ny betongdam har Statkraft Energi AS planlagt å utbetra Damvegen, byggja to vegtunnelar og leggja til rette for båtparkering og båtutslepp ved Dammen.
Ein detaljplan for miljø og landskap er på høyring, og Kvam herad skal uttala seg. Fristen er 28. juni.
Det som fanga interessa til politikarane, var kva tilgang ålmenta vil ha til vegen etter at prosjektet er ferdig. Det same peikar rådmannen på.
Lysregulering?
Rådmannen skriv i saksutgreiinga at heradet er nøgd med løysingane for vegtilkome, men vil be om meir detaljar om korleis tilkoma vert for innbyggjarar etterpå. Ho tek i framlegget til orde for at tilkoma skal vera så tilgjengeleg som mogleg for ålmenta.
Prosjektleiar Jørn Fosen Simonsen sa nyleg til HF at han ikkje er overtydd om at vegen vil verta open for alle. Den om lag 2.500 meter lange tunnelen, som går frå Langhamrane i nærleiken av Heller, vert nemleg ikkje bygd som ein offentleg vegtunnel, forklara han. Tidlegare har det vore snakk om ein slags port med kode ved tunnelen, opplyste Ørjansen i planutvalsmøtet.
Even Øyri (Ap) meiner at heradet bør pressa på for å gjera tiltaket meir ope for ålmenta. Lysregulering i tunnelen kan vera ei løysing, meiner han. Utvalsleiar og varaordførar Frode Nygård (Frp) støtta Øyri, og sa at fleire i Ålvik har gjeve signal om at vegen bør vera open for alle. Innbyggjarane meiner at det vil vera urimeleg om nokre skal få tilgang, men ikkje andre.
Viktig å informera
Torsdag 13. juni drøfta formannskapet fråsegna. Der var tonen nokså lik. Nygård føreslo å be om at detaljplanen omtalar kva som skal skje med tilkoma til ålmenta via tunnelen etter at anleggsperioden er ferdig. I framlegget står det òg at heradsstyret ynskjer at vegen skal vera tilgjengeleg for ålmenta.
Vidare ber heradsstyret om at eit folkemøte vert halde både før og under bygginga, og at lokale medium vert nytta for å halda innbyggjarane oppdaterte i byggjefasen.
Politikarane var samde. Framlegget vart eit fellesframlegg og samrøystes vedteke.
Heradsstyret skal vedta fråsegna 20. juni.
HF gjer merksam på at redaktør Sigbjørn Linga eig ein fritidsbustad ved Bjølsegrøvatnet. Red.
