— Alder har ikkje noko å seia

Etter at dei fyrste skifta er ferdige, treffest bussjåførane til ein kopp kaffi på kontoret rundt halv ni. Slik er det kvar dag. Om fredagane vert det laga vaflar. Praten er lettbeint og det er ein fleipande tone mellom sjåførane.

— Men dette er også litt av minuset med jobben: At du må ut på morgonen, og så ut att på ettermiddagen, seier Arne O. Byrkjeland.

Han har vore bussjåfør sidan midten av 1980-talet. Mellom skifta er han heime og tergar kjerringa, ifylgje han sjølv.