Aktsemd som kostar
Kvifor må utbyggjarar i eit godkjent byggjefelt greia ut risiko for skred?
Det undrar Bente Bjotveit (Sp), som tok saka opp i spørsmål til rådmannen. Ho viste til byggjefeltet Svåsandhagen ved Solesnes, der fleire i seinare tid skal ha fått krav om kvikkleireskredutgreiingar i eit felt som vart regulert og godkjent av Jondal kommune. Dei som bygde tidleg, derimot, slapp visstnok slike krav.
Bjotveit meiner kommunen bør ta ansvar for å greia ut skredfaren for heile feltet. Ho viser til at feltet er kommunalt.
Kommunalsjef for kultur, næring og samfunn, Kristian Bondhus-Jensen, påpeika i møtet i utval for samfunn, plan og næring 5. juni at aktsemdkarta medfører krav om utgreiing i området som kan ha potensial for kvikkleireskred. Tidlegare tenkte ikkje kommunen på denne risikoen før han vedtok planar.
– Krava slår inn sjølv om planen ligg der, sa han.
Han sa at ein kan avskriva faren enkelt om ein finn fjell. Elles må utbyggjaren hyra geolog, som fort kan kosta 50.000–60.000 kroner. Han sa at kommunen kan ta ansvar for eit større område, slik han gjer til dømes i Odda for tida, men at det vil kosta pengar. Når det gjeld kvikkleirekartlegging, er ein ikkje komen langt, sa han.
Bjotveit spurde elles om det er mogeleg for kommunen å godkjenna utbygging på tomter før detaljar som plassering av snø og renovasjonsdunkar er på plass. Slike krav frå kommunen har nemleg vorte tema i Svåsandhagen.
Bondhus-Jensen meiner det berre skulle mangla at slikt er på plass.
– Skal du byggja deg eit hus, skal du laga ein liten plan for tomta. Det er gjort på få minutt å teikna og leggja ved søknaden. Det er det minste me kan forventa av ein profesjonell utbyggjar, sa han.
