Å ta klesvasken på natta har minimalt å seie for straumrekninga

– Viss du tenker på det heile forbruket til eit hushald gjennom heile året utgjer romoppvarming 55 prosent av totalen, seier energirådgivar Trond Paasche i Enova til Nynorsk pressekontor.

Enova er eigd av Klima- og miljødepartementet og blei oppretta i 2001 for å bidra til omlegging av energibruk og energiproduksjon. Dei administrerer i dag ei rekke støtteordningar til energi- og klimatiltak både for bedrifter og private hushald.

Ikkje vask om natta

Dei siste månadane har vi fleire stadar lese om fortvilte privatpersonar som for å spare straum har stått opp midt på natta for å koke kaffi eller vaske klede.

– Er dette gode straumsparetips?

– Nei, dette er noko ein absolutt ikkje bør gjere. Ei forholdsvis ny vaskemaskin er konstruert for å bruke lite vatn og likevel vaske bra, men dei må bruke lang tid. På ein 40- og ein 60-graders vask bruker den maskina berre 0,5 kilowattimar på heile vaskesyklusen. Det er nesten ingenting å spare på å flytte klesvasken til nattetid, seier Paasche.

– Illusjonen om at det lønner seg å vaske klede på natta kan vi legge død. Det er romoppvarming og varmtvatn som er dei store straumsluka, legg han til.

Lag temperatursoner

Paasche fortel at det er fleire enkle grep ein kan gjere for å spare straum på oppvarming.

– Om ein har moglegheit senke temperaturen berre ei grad utgjer det cirka fem prosent av straumbruken som går på romoppvarming, fortel energirådgivaren.

Han tilrår òg å dele inn bustaden i ulike temperatursoner.

– Gangen treng ikkje vere like varm som stova. Hugs å lukke dørene inn til ulike rom så held dei betre på ønskt temperatur.

I tillegg viser han til at finst ei rekke styringsverktøy ein kan investere i.

– Såkalla smart straumstyring, som også Enova har støttetiltak for, kan hjelpe deg å flytte dei tunge lastane utan at det går utover komforten. Eit døme er golvvarme, ein treng ikkje å ha han på heile tida. Med smart straumstyring kan ein bestemme kva tidspunkt han skal vere på. Den kan regulere seg automatisk etter straumpris og slik kan ein unngå å bruke golvvarme når straumprisen er på det høgaste, seier Paasche.

Han viser til at smart straumsparing også kan nyttast på oppvarming i varmtvasstanken.

– Når ein nettopp har dusja slår oppvarminga i varmtvasstanken inn og det skjer gjerne på morgonen når straumen er som dyrast. Med smart straumsparing kan ein «be» varmvasstanken om å vente med å varme opp nytt vatn.

Driftsstyrar i eigen heim

Frå 1. juli tredde òg ein ny nettleigemodell i kraft. Den fungerer slik at ein får ekstra påslag på nettleiga om ein brukar mykje straum samstundes. Målet med den nye nettleigeordninga er å fordele straumforbruket jamnare utover døgnet og på den måten halde kostnadane nede.

Det viktigaste å hugse på er å jamne ut forbruket. Det vil seie at ikkje mesteparten av straumforbruket skjer i den same timen. Du kan spare nettleige om du brukar nettet når det er god kapasitet og om du jamnar ut forbruket ditt, skriv NVE på nettsida sine.

– Ein må no vere meir forsiktig med å bruke mykje effekt samtidig, slik at det bikkar over og du får fleire hundre kroner i ekstrakostnader på nettleiga. Før betalte ein berre per kilowattime uavhengig av kor stor effekt ein belasta, så sant ikkje hovudsikringa rauk, seier Paasche.

– Ein må rett og slett vere driftsstyrar i eigen bustad for å prøve å unngå å nå straumtoppane og samstundes vere medviten om kva timeprisen på straum ligg på. Det er mykje å passe på, men om ein ikkje er i nærleiken av dei toppane på effekten, så er ikkje det noko problem.

Lev som normalt

Eit siste tips frå Paasche er at ein trass i dystre scenario og spådommar om skyhøge rekningar må prøve å leve som normalt.

– Lag deg mat, kok vatn og kaffi. Ikkje stå opp midt på natta for å bruke straum. Ikkje la frykta styre, avsluttar energirådgivaren.

(©NPK)