52 millionar laks døydde i merdane i fjor

52,1 millionar laks døydde i merdane i 2020. Det totale tapet av oppdrettslaks i sjøen var på 60,3 millionar.

Det er ikkje langt unna rekordtapet på 53,2 millionar frå 2019. Det høge talet i 2019 kunne delvis forklarast med algekatastrofen i Nordland og Troms. Veterinærinstituttet har ikkje funne ei enkelthending som kan forklare kvifor 2020-tala er så høge, skriv Fiskeribladet.

Den nasjonale dødsraten er på 14,8 prosent i 2020.

Den årlege rapporten frå Veterinærinstituttet vart lagt fram onsdag. Rapporten tek føre seg helse- og velferdssituasjonen for fisk, og tala byggjer på offisiell statistikk, data frå Veterinærinstituttet og private laboratorium.

Ingunn Sommerset ved Veterinærinstituttet kallar død fisk- problematikken for kompleks, og at forklaringa truleg ikkje er at det er lagt ut meir fisk.

Sjølv om dødsraten er 14,8 prosent nasjonalt er det store regionale forskjellar. Det er lågast dødsrate i produksjonsområde 13, heilt nord i landet, der dødsraten er 6,7 prosent.

Høgast dødsrate er det i produksjonsområde 4 på Vestlandet, der talet er 27,2 prosent.

(©NPK)