318 koronasmitta innlagde på norske sjukehus – sju færre enn onsdag
Det er 318 personar innlagde med koronasjukdom på norske sjukehus, ein nedgang på sju personar frå onsdag. 96 av dei innlagde blir behandla med respirator.
For første gong har talet på innlagde på respirator gått ned, frå 99 onsdag til 96 torsdag, viser tal frå Helsedirektoratet.
239 av koronainnleggingane er i Helse sør-aust, 42 i Helse vest, 22 i Helse Midt-Noreg og 15 i Helse nord.
Artikkelen held fram under annonsen.
Blant dei i respirator er 70 i Helse sør-aust, 13 i Helse vest, 7 i Helse Midt-Noreg og 6 i Helse nord.
Det var ved midnatt registrert 4.935 personar med koronasmitte i Noreg, ein oppgang på 280 på eitt døgn, ifølgje tal frå Meldingssystem for smittsame sjukdommar (MSIS).
Torsdag hadde 98.587 personar vorte testa, ein auke på 4.322 frå dagen før, opplyser Folkehelseinstituttet. Rundt 5 prosent testar positivt for koronavirus.
109 personar med koronasmitte er torsdag innlagde på intensiveining, to meir enn onsdag. Totalt har 180 personar med koronasmitte fått intensivbehandling. Desse har ein gjennomsnittsalder på 61 år og 76 prosent er menn.
45 personar som har testa positivt for korona, er så langt stadfesta døde. Desse har ein gjennomsnittsalder på 83 år.
