316 innlagde med koronavirus på norske sjukehus – færre i respirator

Måndag er 316 pasientar innlagde på sjukehus med koronavirus i Noreg. 83 av dei blir behandla med respirator, noko som er seks færre enn søndag.

83 får respiratorbehandling, noko som er ein nedgang frå 89 søndag. Laurdag var talet på respiratorpasientar 98. Det opplyser Helsedirektoratet.

240 pasientar er innlagde i Helse sør-aust, 33 i Helse vest, 25 i Helse Midt-Noreg, og 18 i Helse nord.

Helseføretaket med flest innlagde er Oslo universitetssjukehus, med 66 pasientar, medan Ahus har 55 innlagde.

Lovisenberg Diakonale Sjukehus i Oslo har 14 pasientar innlagde med koronasmitte, medan Diakonhjemmet sjukehus har 11 pasientar. Det inneber at det samla for Oslo er 91 innlagde koronapasientar.

Totalt 5.755 personar er no melde smitta med koronavirus. Det viser dagsrapporten frå Folkehelseinstituttet (FHI). Dette er tal henta frå meldingssystemet for smittsame sjukdommar (MSIS).

Tala frå FHI viser at det totalt er registrert 59 dødsfall varsla inn til FHI per måndag morgon. Gjennomsnittsalderen for dei døde er 84 år (frå 51 til 102 år), og 51 prosent er menn.

Tal frå VG viser til 74 døde, men dette inkluderer dødsfall som enno ikkje er varsla inn til FHI sidan VG oppdaterer fortløpande.

Ifølgje FHI-oversikta er totalt 111.299 personar testa for covid-19. Rundt 5 prosent av dei som er testa, er smitta. Delen av dei testa som er smitta, har gått ned dei siste dagane. Gjennomsnittsalder for dei som er melde smitta, er 48 år, medan kjønnsfordelinga er lik.